მე-9 ქართველი სლოვაკეთში | სილაგაძე პოდბრეზოვაში ითამაშებს

ლუკა სილაგაძე კარიერას სლოვაკეთში, პოდბრეზოვაში გააგრძელებს. ტრანსფერი სამენეჯერო კომპანია BEPROGEO 2021-ის ჩართულობით განხორციელდა.

ლუკას ახალი გუნდი სლოვაკეთის 12-გუნდიან ჩემპიონატში მე-6 ადგილზეა.

გასულ სეზონში ლუკა იბერიასთან ერთად საქართველოს ჩემპიონი გახდა. 2026 წლის სეზონში იბერიას რიგებში ყველა ტურნირის ჩათვლით 41 მატჩში 5 გოლი გაიტანა და 9 საგოლე პასი შეასრულა.

26 წლის ფეხბურთელს უცხოეთში, კერძოდ ლატვიაში თამაშის გამოცდილება აქვს. ვალმიერას, ლიეპაიასა და რფს-ის ღირსებას იცავდა. 2022 წელს ვალმიერასთან ერთად ლატვიის ჩემპიონი გახდა, 2024 წელს რფს-თან ერთად ჩემპიონობასთან ერთად ქვეყნის თასიც მოიგო. ასევე, 2024 წელს რფს-სთან ერთად ევროპა ლიგის ლიგის ფაზაში ითამაშა და მნიშვნელოვანი გამოცდილება დააგროვა.

სლოვაკეთის უმაღლეს ლიგაში 9 ქართველი ფეხბურთელი თამაშობს: გურამ კაშია (სლოვანი), გიორგი მოისწრაფიშვილი, ლუკა ხორხელი (ორივე სპარტაკ ტრნავა), გიორგი გაგუა, ცოტნე კაპანაძე (ორივე დუნაისკა სტრედა), სანდრო ნარიმანიძე (ჟილინა), თორნიკე ძოწენიძე (მიხალოვცე), გია ნადარეიშვილი (ტრენჩინი), ლუკა სილაგაძე (პოდბრეზოვა).