შეწყვეტილი მატჩი, ბრაჰიმის გაფუჭებული პენალტი და გოლი ექსტრა ტაიმში - სენეგალი აფრიკის თასის ჩემპიონია

სენეგალის ნაკრები აფრიკის თასის გამარჯვებულია. სენეგალელებმა ტურნირის ფინალში მასპინძელი მაროკოს ნაკრები დაძაბულ ბრძოლაში მინიმალური სხვაობით, 1:0 დაამარცხეს და აფრიკის კონტინენტის ჩემპიონობა ისტორიაში მეორედ იზეიმა,

შეხვედრის ძირითადი დრო ფრედ, 0:0 დასრულდა, გამარჯვებულის გამოსავლენად კი ორი დამატებითი ტაიმის დანიშვნა გახდა საჭირო, სადაც უფრო ძლიერი სენეგალი აღმოჩნდა. ერთადერთი გოლი 94-ე წუთზე პაპი გეიმ გაიტანა.

მეორე ტაიმის მიწურულს მომხდარი ინციდენტის გამო მატჩი რამდენიმე წუთით შეწყდა და მთავარ მსაჯს 25 წუთის დამატება მოუწია. ამის მიზეზი კი მე-8 დამატებულ წუთზე სენეგალის კარში დანიშნული თერთმეტმეტრიანი გახდა. არბიტრის გადაწყვეტილებით უკმაყოფილო სენეგალის მთავარმა მწვრთნელმა ფეხბურთელებს თამაშის შეწყვეტისკენ მოუწოდა, თუმცა თავისი თანაგუნდელები მოედანზე სადიო მანემ დააბრუნა, რომელმაც ფეხბურთელებს უთხრა: „დაბრუნდით! ჩვენ კაცურად უნდა ვითამაშოთ!“

სენეგალის ნაკრების კარში დანიშნული პენალტი ბრაჰიმ დიასმა შეასრულა, თუმცა არაზუსტად და შედეგად, მატჩი დამატებით დროში გადავიდა, სადაც გამარჯვება სენეგალელებმა მოიპოვეს.