„პარი სენ-ჟერმენის ყველაზე სახიფათო ფეხბურთელი“ | რას წერს ფრანგული პრესა ხვიჩაზე

ხვიჩა კვარაცხელიას „პარი სენ-ჟერმენი“ საფრანგეთის თასისთვის ბრძოლას გამოეთიშა. 1/16-ფინალში ქართველი ფეხბურთელის გუნდი „პარიზს“ დაუპირისპირდა და 0:1 დამარცხდა. „კვარა“ აქტიური იყო და შეხვედრის შემდეგ ფრანგულმა გამოცემებმა ის პსჟ-ის საუკეთესო ფეხბურთელად დაასახელეს.

L’Equipe (6 ქულა): „თამაშს ტემპს მატებდა და დრიბლინგებისა და შეზღუდულ სივრცეებში კარგად თამაშის უნარის წყალობით პარი სენ-ჟერმენის ყველაზე სახიფათო ფეხბურთელი იყო. 36-ე და 56-ე წუთებზე მაიულუს და რამუშს კარგი მომენტები შეუქმნა, პირველი ტაიმის ბოლოს კი თავად დაარტყა, მაგრამ მეკარემ აუღო. ფიზიკური თვალსაზრისით, სეზონის შედარებით მოკრძალებული სტარტის შემდეგ, ბევრად უკეთ გამოიყურება.“

Footmercato (6 ქულა): „ეჭვგარეშეა, რომ პარი სენ-ჟერმენის ყველაზე სახიფათო ფეხბურთელი იყო. ბურთს 73-ჯერ შეეხო და ერთ-ერთი იყო იმ იშვიათთაგან, ვინც პარიზის დაცვას სერიოზული პრობლემები შეუქმნა. 22-ე წუთზე კარგად ითამაშა, 36-ე წუთზე მაიულუ დატოვა ხელსაყრელ პოზიციაში, შემდეგ კი პირველი ტაიმის საუკეთესო მომენტი შექმნა, მაგრამ მისი დარტყმა მეკარემ მოიგერია.“

Le Parisien (5 ქულა): „თანაგუნდელებს რამდენიმე მომენტი შეუქმნა: ბარკოლას (მე-12 და 25-ე წუთებზე), რამუშს (56-ე წუთზე). პირველი ტაიმის ბოლოსკენ თავად დაარტყა და 51-ე წუთზე სახიფათოდ ჩააწოდა. ქართველ ფეხბურთელს შეეძლო, განსხვავება შეექმნა. მან პარიზს სერიოზული პრობლემები შეუქმნა და 65-ე წუთზე მის ნაცვლად უსმან დემბელე შევიდა, რომელსაც გოლის გატანა შეეძლო.“

90Min (6 ქულა): „ბრწყინვალე პირველი ტაიმი ქართველი ფეხბურთელისგან. აჩქარებებით, სოლორეიდებითა და დრიბლინგებით პარიზის დაცვას საფრთხეს უქმნიდა. შეიძლებოდა, საგოლე გადაცემა მიეთვალა, მაიულუს უკეთ რომ ეთამაშა.“

Maxifoot (6 ქულა): „ქართველ ფეხბურთელს დიდი გავლენა ჰქონდა და პარიზის დაცვა ააწიოკა. მობილურობითა და დაუღალავი შრომის წყალობით პარი სენ-ჟერმენის საუკეთესო მომენტების შემქმნელი იყო. ჰქონდა შანსი, საგოლე გადაცემა გაეფორმებინა და ასეც უნდა მომხდარიყო, მაგრამ თანაგუნდელებმა მომენტები ვერ გამოიყენეს.“

Parisfans (4 ქულა): „მომენტები შექმნა, მაგრამ სიზუსტე აკლდა, რათა შეტევები უკეთ დაეგვირგვინებინა. ქართველი გარემარბისგან მეტს ველოდებით.“

ცნობისთვის, „პარიზთან“ მატჩში Sofascore-მა კვარაცხელიას თამაში 7.2 ქულით შეაფასა. ხვიჩამ კარისკენ სამჯერ დაარტყა, ორჯერ დაუბლოკეს. გააკეთა ოთხი საკვანძო პასი, გადაცემები 83-პროცენტიანი სიზუსტით გაანაწილა და დრიბლინგის ოთხი მცდელობიდან სამი წარმატებულად დაასრულა.