მეტოქეების ვიდეოანალიზს არ აკეთებენ | საფრანგეთში სენტ-ეტიენის ხელმძღვანელებს აკრიტიკებენ

ცნობილმა ფრანგმა ჟურნალისტმა რომენ მოლინამ ზურიკო დავითაშვილის „სენტ-ეტიენი“ მკაცრად გააკრიტიკა. მოლინა კლუბის მენეჯმენტის მუშაობით აშკარად იმედგაცრუებულია და „მწვანეებთან“ დაკავშირებით საინტერესო დეტალებს ამხელს.

„სენტ-ეტიენში კარგად იციან, როგორ ააწყონ კომუნიკაცია — ეს განსაკუთრებით ულტრასებთან ურთიერთობაში გამოჩნდა. დიახ, სწორად მოიქცნენ, მაგრამ გჯერათ, რომ ეს გულწრფელობის გამო გააკეთეს? თუ უბრალოდ გულშემატკივრების მხარდაჭერის დაბრუნება უნდოდათ?

სენტ-ეტიენის რეალური პრობლემა ლიდერების ეგოებს უკავშირდება. როგორ ავხსნათ ის ფაქტი, რომ კლუბმა 20–30 მილიონი ევრო დახარჯა და მაინც ლიგა 1-დან გავარდა? როგორ ავხსნათ, რომ ზაფხულში კიდევ 20 მილიონი დაიხარჯა და გუნდი ლიგა 2-შიც ვერ დომინირებს?

ჯამში დაახლოებით 50 მილიონი ევრო დაიხარჯა და მიუხედავად ამისა, სოლიდური დაცვის ხაზი მაინც არ არსებობს. მაოცებს, რატომ იჩენენ გულშემატკივრები ამდენ მოთმინებას კლუბის ხელმძღვანელების მიმართ.

კონკრეტული მაგალითებიც არსებობს: დავითაშვილსა და სტასინს წასვლა სურთ, და რას ვაკეთებთ? — ფაქტობრივად არაფერს. ვერაფერს ვხედავ.

ცოტა ხნის წინ კიდევ ერთი საინტერესო ინფორმაცია მივიღე: სენტ-ეტიენში მეტოქეების ვიდეოანალიზი პრაქტიკულად არ ტარდება. მათ თავი ისეთი ძლიერი ჰგონიათ, რომ ეს საჭირო არ მიაჩნიათ. ჩემი აზრით, „მწვანეების“ გულშემატკივრები ამაზე უარეს მდგომარეობას უბრალოდ ვერ მიიღებდნენ“.

ცნობისთვის, „სენტ-ეტიენს“ 30 ქულა აქვს და სატურნირო ცხრილში მეორე პოზიციას იკავებს. სწორედ რომენ მოლინაა ის ჟურნალისტი, რომელმაც ადრე დაწერა, რომ „მწვანეები“ ზურიკო დავითაშვილისა და ლუკას სტასინის გაყიდვისთვის მზად არიან.