სამუდამო კონტრაქტი ენრიკეს? - პსჟ უპრეცედენტო შეთავაზებას ამზადებს
პარი სენ ჟერმენი ლუის ენრიკესთვის უპრეცედენტო კონტრაქტის შეთავაზებას აპირებს.
2023 წელს, კრისტოფ გალტიეს შემცვლელად დანიშნულმა ესპანელმა მწვრთნელმა ჩაიბარა კლუბი, რომელიც წლების განმავლობაში შიდა დომინაციით იყო ცნობილი, მაგრამ ევროპულ ასპარეზზე მუდმივი იმედგაცრუება თან სდევდა. ორ წელზე ნაკლებ დროში კი პსჟ აღარ მისდევს ისტორიას — ის უკვე თავად წერს მას.
ლუის ენრიკეს ხელმძღვანელობით, ფრანგულმა გრანდმა გასულ სეზონში თავისი პირველი ჩემპიონთა ლიგა მოიგო, რითიც საბოლოოდ მოიშორა ფსიქოლოგიური ბარიერი, რომელიც კლუბს ათწლეულზე მეტხანს აწვებოდა.
ეს გარღვევა გახდა გარდამტეხი მომენტი, რომელმაც ევროპაში პარიზული ფეხბურთის აღქმა შეცვალა და ლუის ენრიკე ახალი ეპოქის არქიტექტორად აქცია. ყველა ტურნირზე ჩატარებულ 143 მატჩში ენრიკეს გუნდი აფიქსირებს 98 გამარჯვებას, 26 ფრეს და მხოლოდ 19 მარცხს, რაც 68.53%-იან გამარჯვების მაჩვენებელს უდრის. ასეთი სტაბილურობა წარმატებებშიც აისახა — მათ შორის საკონტინენტთაშორისო თასის მოგება „ფლამენგოსთან“, რომელსაც „ჩელსის“ ყოფილი მცველი ფილიპე ლუისი წვრთნის, რაც თითქმის უნაკლო 2025 წლის გვირგვინი გახდა.
ერთადერთი ლაქა მხოლოდ მსოფლიო საკლუბო ჩემპიონატის ფინალის წაგება იყო ენცო მარესკას გაწვრთნილ ჩელსისთან. თუმცა ამ წარუმატებლობამაც ვერ შეარყია განცდა, რომ ეს გუნდი შესაძლებლობების პიკზე თამაშობს.
მიუხედავად იმისა, რომ ლუის ენრიკეს მოქმედი კონტრაქტი 2027 წელს იწურება, პსჟ უკვე ცდილობს მისი მომავლის უზრუნველყოფას. Diario AS-ის ინფორმაციით, კლუბი სერიოზულად განიხილავს ე.წ. „სიცოცხლის ბოლომდე კონტრაქტის“ შეთავაზებას — იდეას, რომელსაც აქამდე ევროპული ელიტური ფეხბურთი არ იცნობდა.
კლუბის ხელმძღვანელობა აღფრთოვანებულია ენრიკეს მუშაობით და სულ უფრო მეტად არიან დარწმუნებულნი, რომ სწორედ ის უნდა იყოს პსჟ-ს სპორტული ხედვის გრძელვადიანი მმართველი. მათთვის ის უბრალოდ მწვრთნელი აღარ არის — იგი კლუბის მომავალი იდენტობის საყრდენად მიიჩნევა, ადამიანად, რომელსაც შეუძლია არა მხოლოდ პერიოდული წარმატებები, არამედ სტაბილური დომინირება.
თავად ესპანელმა სპეციალისტმა 2025 წელი შეაფასა:
„ეს კლუბისთვის ისტორიული პერიოდია. ჩვეულებრივ, შეფასებები სეზონის ბოლოს კეთდება, მით უმეტეს, რომ ახლა უკვე 2025–2026 წლების სეზონში ვართ. შესაძლოა ახლა ამის დრო არ არის, მაგრამ თუ მხოლოდ 2025 კალენდარულ წელს შევხედავთ, ცხადია — ეს ისტორიულია კლუბისთვის და პარიზელებისთვის. ჩვენ ბედნიერები ვართ. ამავდროულად, გვიხარია საშობაო არდადეგებიც — აღდგენისთვის ეს დრო ძალიან გვჭირდება. თუმცა არდადეგების შემდეგ სიამოვნებით დავბრუნდებით და სეზონის დარჩენილ ნაწილზე ვიფიქრებთ.“
შეგახსენებთ, რომ პარი სენ ჟერმენი საახალწლო არდადეგებს ლიგა 1-ში მეორე ადგილზე ხვდება. ენრიკეს გუნდი ლანსს მხოლოდ 1 ქულით ჩამორჩება. რაც შეეხება ჩემპიონთა ლიგის ფაზას, ფრანგული გიგანტი 13 ქულით მე-3 პოზიციას იკავებს და ლიდერ არსენალს 5 ქულით ჩამორჩება.
