ატლეტიკომ და ბარსელონამ კრისტალ პალასს მიმართეს - გეჰისთვის ბრძოლა დაიწყო

„კრისტალ პალასის“ 25 წლის ცენტრალური მცველის მარკ გეჰის მიმართ დიდი ინტერესია. ინგლისელი ფეხბურთელი 2026 წლის ზაფხულში თავისუფალი აგენტი ხდება და სატრანსფერო ბაზარზე ძალიან მიმზიდველად გამოიყურება.

ესპანური Marca-ს ცნობით, გეჰის მიმართ დიდ ინტერესს მადრიდის „ატლეტიკო“ და „ბარსელონა“ გამოხატავენ.

ცნობილი ინსაიდერის მატეო მორეტოს ინფორმაციით, მადრიდელები უკვე დაუკავშირდნენ „კრისტალ პალასის“ მცველის წარმომადგენლებს, რომელიც ზაფხულში გუნდის დატოვებას აპირებს.

ჯერჯერობით უცნობია, თუ სად სურს კარიერის გაგრძელება თავად ინგლისელს. შეთავაზებები, რომ მრავლად ექნება, ეს უკვე აშკარაა.

გეჰისთვის ბრძოლას გეგმავს მიუნხენის „ბაიერნიც“. „ბარსელონამ“ კი „ატლეტიკოს“ მსგავსად გეჰის ინფორმაცია გამოითხოვა. კატალონიელები მის გაფორმებას სერიოზულად განიხილავენ.

გარდა გეჰისა, „ბარსას“ სიაში კიდევ 3 გვარია: გონშალუ ინასიუ (სპორტინგი), მურილიო (ნოტინგემ ფორესტი) და ნიკო შლოტერბეკი (დორტმუნდი).

ბოლოს გეტყვით, რომ მარკ გეჰიმ მიმდინარე სეზონში „კრისტალ პალასის“ რიგებში 20 ოფიციალურ შეხვედრაში მიიღო მონაწილეობა, 1 გოლი გაიტანა და 3 საგოლე გადაცემა შეასრულა.