7 ქულა და ჩატენვა | მამუკელაშვილის ტორონტომ ზედიზედ მეოთხე თამაში მოიგო

სანდრო მამუკელაშვილის „ტორონტო რეპტორსმა“ ზედიზედ მეოთხე შეხვედრა მოიგო. ქართველი კალათბურთელის გუნდი საკუთარ კედლებში „შარლოტ ჰორნეთსს“ დაუპირისპირდა და დაძაბულ ბრძოლაში იმარჯვა - 110:108.

მამუკელაშვილმა თამაში სათადარიგოთა სკამზე დაიწყო და პარკეტზე 14 წუთი და 51 წამი გაატარა. სანდროს მონაგარი ასეთი იყო: 7 ქულა, 4 მოხსნა, 1 შედეგიანი გადაცემა, 1 დაფარება. „მამუმ“ ორიდან ერთი სამქულიანი და ხუთიდან ორი ორქულიანი ჩააგდო, ერთი დაკარგვა ჰქონდა და სამი ჯარიმა მიიღო.

„ტორონტოს“ რიგებში საუკეთესო ბრენდონ ინგრემი იყო - 27 ქულა, 6 მოხსნა, 3 შედეგიანი გადაცემა. არ ჯეი ბარეტმა და სკოტი ბარნსმა 16-16 ქულა დააგროვეს, ხოლო იმანუელ ქუიკლიმ 15 ქულა და 10 მოხსნა მიითვალა. „ჰორნეთსის“ მხრიდან ყველაზე მეტი, 24 ქულა კონ კნუპელმა ჩააგდო. მაილს ბრიჯისმა 22 ქულა დააგროვა, ლამელო ბოლმა - 20.

ცნობისთვის, „რეპტორსს“ 9 მოგება და 5 წაგება აქვს და აღმოსავლეთ კონფერენციაში მესამე ადგილზეა. კანადელები მომდევნო შეხვედრას 20 ნოემბერს, „ფილადელფია სევენთი სიქსერსის“ წინააღმდეგ გამართავენ.