ზედიზედ მეორე მატჩში გაიტანა | ფაცაციას შედეგიანი თამაში ალბანეთში

ალბანეთის უმაღლეს ლიგაში „ტირანას’’ ქართველი შემტევი ცოტნე ფაცაცია შედეგიანია, ბოლო ორ მატჩში გაიტანა, ორივე მატჩში პენალტი გოლად აქცია.

მე-5 ტურში „ტირანა’’ შინ თანაქალაქელ „დინამოსთან’’ 1:2 დამარცხდა, მასპინძელთაგან ერთადერთი გოლი ფაცაციამ შეაგდო. მე-6 ტურში „პარტიზანი’’ შინ „ტირანასთან’’ 0:3 დამარცხდა (სტუმართა პირველი გამარჯვებაა მიმდინარე სეზონში), 32-ე წუთზე ფაცაციამ მის მიერ მოპოვებული პენალტიდან გაიტანა და ამ გოლით ანგარიში 0:2 გახდა.

ფაცაციას გოლები

 

ალბანეთის ჩემპიონატის მიმდინარე სეზონში ფაცაციამ „ტირანაში'' 6 მატჩი ჩაატარა (5 სასტარტოში) და მის ანგარიშზე 2 გოლია.

10-გუნდიან ჩემპიონატში „ტირანა’’ 5 ქულით მე-8 ადგილზეა.

25 წლის ქართველი შემტევისთვის „ტირანა’’ პირველი უცხოური კლუბია. მას მარტვილის „მერანში’’, „გაგრაში’’, ქობულეთის „შუქურაში’’, ბათუმის „დინამოსა’’ და ქუთაისის „ტორპედოში’’ უთამაშია.  2025 წლის კრისტალბეთ ეროვნული ლიგის სეზონში 18 მატჩში (8 სასტარტოში) 2 გოლი გაიტანა და 2 საგოლე პასი შეასრულა, ზაფხულში „ტორპედოს'' დაემშვიდობა და კარიერა ალბანურ კლუბს დაუკავშირა. ასევე გეტყვით, რომ ფაცაცია მიწვეული იყო საქართველოს 18, 19, 20 და 21 წლამდე ნაკრებებში.