ოფიციალურად | ჩავი სიმონსი ტოტენჰემის ფეხბურთელია

ჩავი სიმონსმა „ლაიფციგი“ დატოვა და „ტოტენჰემში“ გადავიდა. ლონდონურმა კლუბმა ოფიციალური განცხადება გაავრცელა და დაწერა, რომ ნიდერლანდელმა ფეხბურთელმა „დეზებთან“ გრძელვადიანი კონტრაქტი გააფორმა.

„ძალიან ბედნიერი ვარ და ერთი სული მაქვს, როდის დავიწყებ. ამაზე დიდი ხანია ვოცნებობ. ტოტენჰემი შესანიშნავი კლუბია და როდესაც მთავარ მწვრთნელს შევხვდი, მაშინვე მივხვდი, რომ ტოტენჰემი ჩემთვის შესაფერისი ადგილი იყო.

ტოტენჰემს სანახაობის გარდა, თავდაუზოგავ მუშაობასა და დისციპლინას შევძენ. მინდა, გასამარჯვებლად, გუნდისთვის და გულშემატკივრებისთვის ყველაფერი გავაკეთო“, - განაცხადა სიმონსმა.

„ჩავი სიმონსის ტრანსფერით მოხარული ვარ - ის შესანიშნავი შენაძენია. ჩავი ახალგაზრდაა, თუმცა უკვე დიდი გამოცდილება დაუგროვდა და უმაღლეს დონეზე, ბევრ შეხვედრაში მიუღია მონაწილეობა. მას გოლებისა და საგოლე გადაცემების გაფორმება შეუძლია და აქვს უნარი, როგორც ათიანის პოზიციაზე, ისე მარცხენა ფლანგზე ითამაშოს“, - განაცხადა „ტოტემჰემის“ მთავარმა მწვრთნელმა, ტომას ფრანკმა.

ცნობისთვის, სიმონსს დიდი ხნის განმავლობაში „ჩელსის“ უკავშირებდნენ, მაგრამ „დეზებმა“ „არისტოკრატებს“ აჯობეს და ძლიერი ნახევარმცველი დაიმატეს.