ოფიციალურად | ილია ზაბარნი პსჟ-ის ფეხბურთელია

„პარი სენ-ჟერმენმა“ „ბორნმუთის“ მცველის, ილია ზაბარნის ტრანსფერი დაადასტურა. 22 წლის მცველი პსჟ-ში 6-ნომრიანი მაისურით ითამაშებს და კლუბის ისტორიაში პირველი უკრაინელი ფეხბურთელი იქნება.

ზაბარნი კიევის „დინამოს“ აკადემიის აღზრდილია, 2023 წლიდან კი „ბორნმუთის“ ღირსებას იცავდა, სადაც 86 მატჩში 1 გოლი და 1 საგოლე პასი მიითვალა. 22 წლის მცველს უკრაინის ნაკრებში უკვე 49 მატჩი აქვს ჩატარებული. ზაბარნი პსჟ-თან კონტრაქტს 2030 წლამდე გააფორმებს.

ილია ზაბარნი:

„მიხარია, რომ პსჟ-ს შევუერთდი. ეს მსოფლიოს საუკეთესო კლუბია, რომელსაც საუკეთესო პროექტი აქვს. მოედანზე ყოველთვის ბოლომდე ვიხარჯები და მოუთმენლად ველი ჩემს დებიუტს პსჟ-ის რიგებში“.

„მოხარულები ვართ, რომ ვაძლიერებთ დაცვის ხაზს ილია ზაბარნის ტრანსფერით. ილია ნიჭიერი ფეხბურთელი და კარგი პროფესიონალია, რომელსაც საერთაშორისო დონეზე თამაშის გამოცდილება აქვს. ის დიდ წვლილს შეიტანს იმ გრძელვადიან პროექტში, რომელსაც პსჟ-ში ვაშენებთ“, - აღნიშნა კლუბის პრეზიდენტმა, ნასერ ალ-ხელაიფიმ.

ფრანგული მედიის ინფორმაციით, პარიზელები ზაბარნის სანაცვლოდ „ბორნმუთს“ 67 მილიონ ევროს გადაუხდიან, ბონუსების ჩათვლით კი ტრანსფერის ღირებულება შესაძლოა 70 მილიონამდე გაიზარდოს.