საბა საზონოვის მომავალი | რას წერს ტურინული გამოცემა

საბა საზონოვი „ტორინოდან“ „ემპოლიში“ იყო განათხოვრებული. ქართველმა ფეხბურთელმა მძიმე დაზიანება მიიღო და სეზონის დიდი ნაწილი გამოტოვა, „ლურჯებმა“ კი იტალიის სერია A-ში ადგილი ვერ შეინარჩუნეს და დაქვეითდნენ.

ტურინული გამოცემის, Toronews-ის ინფორმაციით, „ემპოლიმ“ საზონოვის კონტრაქტის გამოსყიდვაზე უარი განაცხადა. ქართველმა ფეხბურთელმა ტრავმა მოიშუშა და სანაკრებო პაუზის შემდეგ, „გრანატას“ შეუერთდება, თუმცა, მისი მომავალი ბურუსითაა მოცული.

Toronews-ის მიხედვით, გუნდში დაბრუნების შემდეგ, საზონოვს სამედიცინო შემოწმება ჩაუტარდება, რათა დადგინდეს ზაფხულში, „ტორინოსთან“ ერთად მომზადებას შეძლებს თუ არა. არაა გამორიცხული, „გრანატამ“ საბა იჯარით კიდევ ერთხელ გაუშვას ან სულაც გაყიდოს. Toronews-ის ცნობით, ტურინელები წინადადებების მისაღებად მზად არიან.

სამწუხაროდ, „ემპოლიში“ გადასვლის შემდეგ, 23 წლის უკანახაზელს საშინლად არ გაუმართლა და უმძიმესი ტრავმა მიიღო. საბამ ვარჯიშზე ჯვარედინი მყესები გაიწყვიტა, რის გამოც მთელი სეზონი გამოტოვა.