„მოტეხე კვარას ფეხები“ - ნაპოლის ფანის სამარცხვინო შეძახილი სტადიონზე
ხვიჩა კვარაცხელია კარიერის ამ ეტაპზე მარტივ პერიოდს ნამდვილად არ გადის, რასაც ქართველი ფეხბურთელის ბოლო თამაშებიც მოწმობს. ხვიჩა ყველა თამაშში აქტიურობს, ბოლომდე იხარჯება და ყველანაირად ცდილობს მდგომარეობის გამოსწორებას და ალბათ, ადრე თუ გვიან ეს შედეგს აუცილებლად გამოიღებს.
ამას ისიც ემატება, რომ არადამაკმაყოფილებელი თამაშის გამო, ქართველ ვარსკვლავს იტალიური მედია აკრიტიკებს, თუმცა, არსებობენ სააგენტოები, რომლებიც ამხნევებენ და ასეთები ძირითადად ნეაპოლური საიტები არიან.
თუმცა, ყველაზე სამწუხარო რაც არის, ხვიჩას წინააღმდეგ შეიქმნა გულშემატკივართა ჯგუფი, რომელმაც რადიკალური გზის არჩევა გადაწყვიტა. ამასთან დაკავშირებით ინფორმაციას ცნობილი ნეაპოლური რადიო და სააგენტო, Kiss Kiss Napoli ავრცელებს და წერს, რომ ეს გულშემატკივრები ხვიჩას გამუდმებით აყენებენ შეურაცხყოფას და მეტოქის ფეხბურთელებს ქართველის დაზიანებას სთხოვენ. ერთ-ერთი ასეთი ფაქტი ჩემპიონთა ლიგის ჯგუფური ეტაპის დასკვნით ტურში, „ბრაგას“ წინააღმდეგაც დაფიქსირდა, სადაც ერთ-ერთი ქომაგი „ბრაგას“ მცველს სთხოვდა, რომ ხვიჩასთვის ფეხები მოეტეხა. Kiss Kiss Napoli ამის წყაროდ ერთ-ერთ გულშემატკივარს ასახელებს, რომელიც შეხვედრას ესწრებოდა.
სააგენტოს საიტზე ამ გულშემატკივრის კომენტარი ვრცელდება:
სტადიონზე ერთ-ერთი იდიოტი, რომელსაც გულშემატკივარსაც ვერ უწოდებ, „ბრაგას“ მცველს უყვიროდა და ეხვეწებოდა, რომ კვარასთვის რამე დაეშავებინა. ის ყვიროდა: „მოტეხე კვარას ფეხები“. რატომ მიდის ასეთი ხალხი სტადიონზე და რატომ ამბობენ, რომ „ნაპოლის“ ფანები არიან?
საბედნიეროდ, ხვიჩას „ბრაგას“ მცველებმა ვერაფერი დააკლეს და ქართველმა შემტევმა ბოლომდე შეუცვლელად ითამაშა. სამწუხაროდ, გოლის გატანა, ან საგოლე გადაცემის შესრულება ვერ შეძლო, თუმცა, „ნაპოლიმ“ მეორე გოლი მისი ბრწყინვალე მოქმედების შემდეგ გაიტანა, როდესაც ეფექტური პასით ნათანი თავისუფალ ზონაში დატოვა და ამ უკანასკნელმაც ვიქტორ ოსიმენს გაატანინა.
ხვიჩა კვარაცხელიამ ჩემპიონთა ლიგის ჯგუფური ეტაპის ექვსივე მატჩში მიიღო მონაწილეობა, თავი კი მხოლოდ 1 საგოლე გადაცემით გამოიჩინა. მისმა გუნდმა სატურნირო ცხრილში 10 ქულით მე-2 ადგილი დაიკავა და პლეი-ოფში თამაშის უფლება მოიპოვა.
