უმნიშვნელოვანესი გამარჯვება | მამარდაშვილის ვალენსიამ ბოლო წამებზე მოიგო

ლა ლიგის 31-ე ტურში, გიორგი მამარდაშვილის „ვალენსია“ საკუთარ კედლებში ერთ-ერთ კონკურენტს, „ვალიადოლიდს“ დაუპირისპირდა და უმნიშვნელოვანესი გამარჯვება მოიპოვა. „ღამურებმა“ მსაჯის მიერ დამატებულ წუთებზე გატანილი გოლით 2:1 მოიგეს.

შეხვედრა „ჩესთვის“ ძალიან ცუდად დაიწყო. მე-6 წუთზე, მუხტარ დიახაბიმ ბავშვური შეცდომა დაუშვა, რომლის შემდეგაც, კაილ ლარინი „მამარდასთან“ პირისპირ დარჩა, ქართველ გოლკიპერს შანსი არ დაუტოვა და საკუთარი გუნდი დააწინაურა.

43-ე წუთზე, „ვალიადოლიდის“ უპირატესობა კინაღამ 2-ბურთიანი გახდა. მამარდაშვილი წინ იყო გამოსული და სერხიო ესკუდერომ მოედნის ცენტრიდან დაარტყა, თუმცა მიზანს ცოტათი ააცილა. რამდენიმე წამის შემდეგ, გიორგიმ თავისთვის ერთადერთი სეივი მიითვალა და მონკუს აუღო.

„ვალენსიამ“ ანგარიში მე-60 წუთზე გაათანაბრა. დიახაბიმ თავისი შეცდომა გამოასწორა და „ვალიადოლიდის“ კარი აიღო, თუმცა ხორდი მასიპის თამაში უნდა აღვნიშნოთ, რომელმაც კარი დაკარგა და უხეში შეცდომა დაუშვა. 5 წუთში, „ვალიადოლიდს“ ხელმეორედ დაწინაურება შეეძლო, მაგრამ მამარდაშვილის კარი ხარიხამ იხსნა. მატჩის საბოლოო ანგარიში ხავი გერამ დააფიქსირა, რომელმაც 93-ე წუთზე გაიტანა.

ცნობისთვის, „ვალენსიას“ 33 ქულა აქვს და „ღამურებმა“ გასავარდნ ზონას თავი დააღწიეს. გიორგი მამარდაშვილის გუნდი მომდევნო მეტოქე „კადისია“, რომელსაც 30 აპრილს დაუპირისპირდება.