კიტეიშვილის მორიგი გოლი - შტურმმა აუსტრიას 3:2 მოუგო

ავსტრიის ბუნდესლიგაში ოთარ კიტეიშვილის გრაცის „შტურმი“ ვენის „აუსტრიას“ დაუპირისპირდა და დრამატულ ბრძოლაში 3:2 დაამარცხა, რომელშიც თავისი წვლილი ქართველმა ლეგიონერმაც შეიტანა.

კიტეიშვილი სასტარტო შემადგენლობაში იმყოფებოდა და მოედანზე 74-ე წუთამდე დარჩა. შემდეგ შეცვალეს, თუმცა იმ მომენტში ანგარიში უკვე 3:2 იყო.

პირველი ტაიმი სტუმრებმა 2:1 მოიგეს. მეორე ნახევარში „შტურმმა“ თამაშის შემობრუნება 2-წუთიან მონაკვეთში შეძლო. 62-ე წუთზე კიტეიშვილმა ანგარიში გაათანაბრა, 63-ე წუთზე კი პირველი გოლის ავტორმა სარკაიმ დუბლი შეასრულა და ტაბლოზე საბოლოო ანგარიში დააფიქსირა - 3:2.

ამრიგად, 27 ტურის შემდეგ გრაცის „შტურმი“ სატურნირო ცხრილში 33 ქულით მეორე ადგილზე იმყოფება და ლიდერ „ზალცბურგს“ 5 ქულით ჩამორჩება.

შეგახსენებთ, რომ კიტეიშვილს მიმდინარე სეზონში ავსტრიის ბუნდესლიგაში 14 შეხვედრაში 4 გოლი აქვს გატანილი და 1 საგოლე გადაცემა შესრულებული.

„შტურმი" მომდევნო შეხვედრას 30 აპრილს თასის ფინალში „რაპიდის" წინააღმდეგ გამართავს.