„ჩემთან და მარადონასთან ერთად ნაპოლიში ითამაშებდა“ - ნაპოლის ლეგენდა ხვიჩაზე

„ნაპოლის“ ლეგენდარულმა ფეხბურთელმა ალესანდრო რენიკამ L'Arena-სთან ინტერვიუში „ნაპოლისა“ და ხვიჩა კვარაცხელიას შესახებ ისაუბრა. მისი აზრით, ჩემპიონთა ლიგის 1/4-ფინალში ნეაპოლური კლუბი „მილანთან“ გასვლით შეხვედრაში ფრეს იმსახურებდა. რენიკა იმედოვნებს, რომ საპასუხო მატჩს „ნაპოლი“ მოიგებს და შემდეგ ეტაპზე გავა.

ალესანდრო რენიკა: „ნაპოლის“ თამაშებს ხშირად ვუყურებ, „დიეგო მარადონაზე“ ნეაპოლელთა შოუს რეგულარული სტუმარი ვარ. „ნაპოლის“ ჩემპიონთა ლიგაზე „მილანთან“ შეხვედრაში იღბალი და გამოცდილება დააკლდა. სპალეტის გუნდმა მატჩის ფრედ დასრულება დაიმსახურა. ორმატჩიან დაპირისპირებაში ანგარიშის შემობრუნება სურთ. მიზნისკენ გულით მიდიან, ქალაქი ოცნებობს, ნეაპოლის ყოველი ქუჩის კუთხეში მათი ფოტოები და დროშებია, ყველაფერი ლურჯია. სერია ა-ს შემდეგ ტურში ჰელას „ვერონასთან“ 3 ქულა სჭირდებათ, რომ სკუდეტოს კიდევ უფრო მიუახლოვდნენ და კონკურენტებს ჩემპიონობის თეორიული შანსიც გაუქრეთ“.

UEFA-ს ჩემპიონთა ლიგის 1/4-ფინალური ეტაპის პირველ შეხვედრაში „მილანმა“ შინ „ნაპოლი“ 1:0 დაამარცხა. საპასუხო მატჩი „დიეგო მარადონაზე“ 18 აპრილს გაიმართება.

რაც შეეხება სერია ა-ს, 30-ე ტურში „ნაპოლი“ ჰელას „ვერონას“ მიიღებს. შეხვედრა 15 აპრილს, 20:00 საათზე დაიწყება. გამომდინარე იქიდან, რომ „ნაპოლი“ პირველ ადგილზეა და მეორეადგილოსანს 16 ქულით უსწრებს და ამავდროულად ჩემპიონთა ლიგის უმნიშვნელოვანესი მატჩი მოახლოებულია, შესაძლოა ლუჩანო სპალეტიმ ხვიჩა კვარაცხელია და გუნდის სხვა გამორჩეული მოთამაშეები დაასვენოს.

ალესანდრო რენიკამ ხვიჩაზე ისაუბრა და აღნიშნა, რომ დიეგო მარადონას ფორმაციის „ნაპოლიში“ ითამაშებდა: 

„ხვიჩა კვარაცხელია სხვა პლანეტიდანაა, ის ჩემთან და დიეგოსთან ერთად ჩვენი ფორმაციის „ნაპოლიში“ თამაშს შეძლებდა“.

ამპლუით მცველი ალესანდრო რენიკა „ნაპოლიში“ მარადონასთან ერთად 1985-91 წლებში თამაშობდა. ამ წლებში „ნაპოლიმ“ სკუდეტო (1986–87, 1989–90), იტალიის თასი (1986-87), იტალიის სუპერთასი (1990) და UEFA-ს თასი (1988-89) მოიგო.