კრისტალბეთ ეროვნული ლიგა: ტორპედომ და სამგურალმა დამაჯერებლად მოიგეს

კრისტალბეთ ეროვნულ ლიგაში მესამე ტურის შეხვედრები მიმდინარეობს. დღის მეორე მატჩი ზესტაფონში, დავით აბაშიძის სახელობის სტადიონზე გაიმართა, სადაც წყალტუბოს  „სამგურალმა“ „თელავს“ უმასპინძლა და მინიმალური სხვაობით, 1:0 გაიმარჯვა.

ერთადერთი გოლი 41 წუთზე ნიკა კალანდარიშვილმა გაიტანა, რომელმაც დემურ ჩიხლაძის საგოლე გადაცემა ზუსტად გამოიყენა.

3 ტურის შემდეგ „სამგურალი“ სატურნირო ცხრილში 6 ქულით მე-3 ადგილს იკავებს, „თელავი“ კი 1 ქულით ჯერჯერობით ბოლოსწინა, მე-9 ადგილზე იმყოფება.

დღის მეორე მატჩი სამტრედიაში, ეროსი მანჯგალაძის სახელობის სტადიონზე ჩატარდა, სადაც გულშემატკივარმა იმერული დერბი იხილა. ადგილობრივმა „სამტრედიამ“ ქუთაისის „ტორპედოს“ უმასპინძლა და უშანსოდ, 0:2 დამარცხდა.

კახა ჩხეტიანის გუნდიდან პირველი გოლი 33-ე წუთზე, გიორგი არაბიძემ საჯარიმო ნიშნულიდან გაიტანა, 66-ე წუთზე კი ნიკა კაჭარავამ კრისტალბეთ ეროვნულ ლიგაში დაბრუნების შემდეგ პირველი გოლი შეაგდო და საბოლოო ანგარიშიც დააფიქსირა.

3 ტურის შემდეგ „ტორპედო“ სატურნირო ცხრილში 5 ქულით მე-4 ადგილს იკავებს, „სამტრედია“ კი 3 ქულით მე-5 პოზიციაზეა.