ქოჩორა სასტარტოში პირველად მოხვდა | სპორტინგი პორტუსთან დამარცხდა

პორტუგალიის ჩემპიონატის მე-4 ტურში ლისაბონის „სპორტინგი’’ შინ „პორტუსთან’’ 1-2 დამარცხდა. 

მიმდინარე სეზონში „სპორტინგმა’’ მის ორ მთავარ კონკურენტთან დაპირისპირება დათმო, სუპერთასზე „ბენფიკასთან’’ 0-1 წააგო.

გიორგი ქოჩორაშვილი, რომელმაც სუპერთასსა და ჩემპიონატის საწყის სამ ტურში ცვლილებაზე ითამაშა, „პორტუსთან’’ სასტარტო 11-ეულში იყო, საქართველოს ეროვნული ნაკრების საყრდენის სასტარტოში მოხვედრას ხელი მისი უშუალო კონკურენტის, იაპონელი ჰიდემასა მორიტას ტრავმამ შეუწყო.

26 წლის ქართველ ნახევარმცველს ბურთთან 45 შეხება ჰქონდა, 36-დან 34 პასი ზუსტად შეასრულა. მინდორზე 7-დან 4 ორთაბრძოლა მოიგო, მეორე სართულზე 1 დუელი ჰქონდა და დათმო. ბურთი მხოლოდ ორჯერ დაკარგა. თამაშის წესი ერთხელ დაარღვია და მის წინააღმდეგაც ერთხელ დაჯარიმდნენ. კარისკენ დარტყმის ერთი მცდელობა არაზუსტი იყო.

67-ე წუთზე, როცა ანგარიში 0:2 იყო, ქოჩორა დანიელმა კონრად ჰარდერმა შეცვალა, რომელიც ამპლუით ფორვარდია.

ამ მატჩის შემდეგ ქოჩორა საქართველოს ეროვნული ნაკრების შეკრებას შეუერთდება.

შეგახსენებთ, საქართველოს ეროვნული ნაკრები ფიფას 2026 წლის მსოფლიოს ჩემპიონატის საკვალიფიკაციო ეტაპისთვის მზადებას იწყებს. ვილი სანიოლის გუნდი პირველი სექტემბრიდან თბილისში შეიკრიბება. საქართველოს ნაკრები შესარჩევი ეტაპის საწყის ორ ტურში საკუთარ მოედანზე თურქეთისა (4 სექტემბერი) და ბულგარეთის (7 სექტემბერი) ნაკრებებს უმასპინძლებს.