კლოპი: “უნდა გავძლიერდეთ, მაგრამ ახლა შესაფერისი მომენტი არ არის“

პრემიერ ლიგის გასულ ტურში „ლივერპულმა“ მტკივნეული მარცხი იწვნია. მერსისაიდული გრანდი „ბრაიტონს“ ესტუმრა და უშანსოდ 0:3 განადგურდა.

ამ წაგების შემდეგ, გულშემატკივრები ტრანსფერებს ითხოვენ, მაგრამ, როგორც ჩანს კლუბში თვლიან, რომ ახალი ფეხბურთელი საჭირო არ არის. ამ საკითხთან დაკავშირებით, იურგენ კლოპმა ისაუბრა.

რა თქვა კლოპმა?

„ვფიქრობ, ჯიუტები ვართ, მაგრამ არ მინდა იფიქროთ, რომ ამ შემადგენლობით 2050 წლამდე ვაპირებ თამაშს. ახლა პირველ რიგში იმაზე უნდა ვიფიქროთ, თუ რისი გაკეთება შეგვიძლია. ეს ბევრად მნიშვნელოვანია. სიტუაციიდან გამოსავალი ტრანსფერები, რომ იყოს აუცილებლად განვახორციელებდით. მაგრამ ჩვენ არსებული შემადგენლობა გვყავს.

მესმის, რომ ცუდად ვთამაშობთ, მაგრამ არ შემიძლია გამუდმებით აქ ჯდომა და სხვისი დადანაშაულება. ცუდი შედეგები ჩემი პასუხისმგებლობაა. დიახ, შეზღუდული ვარიანტები გვაქვს, მაგრამ აქ არიან ფეხბურთელები, რომლებსაც კონტრაქტები აქვთ, მაგრამ ხელმისაწვდომნი არ არიან. ტრავმირებულები, რომ არ მყავდეს სულ სხვა სიტუაცია იქნებოდა.

გასაგებია, რომ ტრანსფერებს ითხოვთ, მაგრამ გუნდი სავსეა. ახალ ფეხბურთელებს პრემიერ ლიგის და ჩემპიონთა ლიგის განაცხადში ვერ შევიყვან. უნდა გავძლიერდეთ, მაგრამ შესაფერისი მომენტი არ არის. ამ სიტუაციის გამო ეს შეუძლებელია. მიუხედავად იმისა, რომ კიდევ ერთი თამაში წავაგეთ ჩემი პასუხი არ შეიცვლება. ტრანსფერებს ახლა ვერ განვახორციელებთ.“

შეგახსენებთ, რომ „ლივერპული“ პრემიერ ლიგაში 18 ტურის შემდეგ, 28 ქულით მე-9 პოზიციაზე იმყოფება და მეოთხე ადგილზე მყოფ „მანჩესტერ იუნაიტედს“ 10 ქულით ჩამორჩება.

„ბრაიტონი“ – „ლივერპული“ 3:0