„ვალენსიაში კმაყოფილნი არიან და მისი სჯერათ" - AS-ის სტატია მამარდაშვილზე
გავლენიანმა ესპანურმა გამოცემამ, AS-მა „ვალენსიას“ მეკარის, გიორგი მამარდაშვილის შესახებ სტატია გამოაქვეყნა სათაურით - „მამარდაშვილი დაფრინავს." ავტორი ყურადღებას ქართველი ახალგაზრდას ასპარეზობაზე ამახვილებს, მის პროგრესზე საუბრობს და „მამარდას“ აქებს.
„იმის თქმა, რომ თბილისის დინამოდან ვალენსიაში გადასვლის შემდეგ, გიორგი მამარდაშვილმა ყველანაირ მოლოდინს გადააჭარბა და ყველა გააოცა, გასაკვირი აღარავისთვისაა. ღამურების რიგებში ჩატარებულ სადებიუტო სეზონში, ქართველმა მეკარემ მონაწილეობა 14 შეხვედრაში მიიღო და ჩეს მტრების წინააღმდეგ, როგორიც მაგალითად ბილბაოა, შესანიშნავი შთაბეჭდილება დატოვა. ამასთან, გარკვეული დროით, მან იასპერ სილესენისგან ძირითადი მეკარის ფუნქციებიც გადაიბარა. კლუბსა და გიორგის სჯერათ, რომ ქართველ გოლკიპერს პროგრესის მიღწევა შეუძლია და სწორედ ამიტომ მუშაობენ კომპონენტებზე, რომელთა გაუმჯობესების შემთხვევაშიც, მამარდაშვილი უფრო კონკურენტუნარიანი გახდება.
ერთ-ერთი ასეთი კომპონენტი გამოსვლაზე, მაღალ ბურთებზე ასპარეზობაა. გიორგი სიმაღლეში 1.97 მეტრია და მისი ერთ-ერთი პრობლემა გადაწყვეტილების მიღების პროცესს უკავშირდება. ვალენსიას საჯარიმოზე განხორციელებული ჩაწოდებებისას გიორგი ყოყმანობს ხოლმე და უჭირს, გადაწყვიტოს კარი დატოვოს თუ არა. თუმცა მეორე მხრივ, ეს მეკარისთვის, რომელიც მხოლოდ 21 წლისაა და ესპანეთში 9 თვეა იმყოფება ნორმალური რამაა. რამდენიმე კვირის წინ, ალავესთან და ბარსელონასთან გამართულ მატჩებში ბორდალასი ქართველი ფეხბურთელის ასპარეზობით უკმაყოფილო დარჩა, რადგან გიორგის მაღალ ბურთებზე კარგად არც ერთხელ უთამაშია.
იმ შეხვედრების შემდეგ, ბორდალასს მამარდაშვილთან საუბარი ჰქონდა და სამწვრთნელო შტაბი როგორც ინდივიდუალურ, ისე გუნდურ დონეზე, მასთან ამ ასპექტზე მუშაობს. ბოლო კვირებში ვალენსიას თავკაცი მამარდაშვილს ავარჯიშებს, რომ სტანდარტული მდგომარეობისას უკეთ იმოქმედოს და აგულიანებს, რომ გიორგიმ კარის ხაზი უფრო ხშირად დატოვოს და სიმაღლეში საკუთარი უპირატესობა გამოიყენოს. ვარჯიშის შედეგი მალიორკასთან და ბილბაოსთან გამართულ შეხვედრებში გამოჩნდა, როცა გიორგიმ გამოსვლებზე ბევრად უკეთ იასპარეზა და მეორე სართულზე მოგებული დუელების მხრივ, მეტოქე გუნდის გოლკიპერებზე უკეთესი შედეგი ჰქონდა.
მეორე კომპონენტი, რომლის გაუმჯობესებასაც მამარდაშვილი ცდილობს, გრძელი გადაცემებია. ბოლო 2 შეხვედრაში, მას აშკარა პროგრესი აქვს. ხეტაფესთან და ელჩესთან მატჩებში ქართველმა 9 გრძელი გადაცემა შეასრულა, რაც ბარსელონასთან, ალავესთან და ბილბაოსთან დაფიქსირებულ შედეგზე უკეთესი მაჩვენებელია. ელჩესთან დაპირისპირებაში ქართველმა მეკარემ კარი მშრალად შეინახა, რაც მე-14 მატჩში მეშვიდედ გააკეთა. ეს განსაკუთრებით შთამბეჭდავია იქიდან გამომდინარე, რომ ვალენსიას 43 გოლი აქვს გაშვებული.
კლუბში იციან, რომ მამარდაშვილმა ბევრ კომპონენტზე უნდა იმუშაოს, მაგრამ ვალენსიაში კმაყოფილი არიან, როგორც მისი თამაშითა და დონით, ისე იმ პროგრესით, რომლის მიღწევაც ქართველს შეუძლია. კლუბში მარტივი სლოგანი აქვთ - გიორგიმ საკუთარი სხეული ბოლომდე უნდა გამოიყენოს და წინსვლა განაგრძოს“, - წერს AS.
შეგახსენებთ, რომ „ვალენსიას“ ნიდერლანდელი გოლკიპერი, იასპერ სილესენი დაუბრუნდა და ბოლო პერიოდში ესპანურ პრესაში დებატები მიმდინარეობს თუ ვინ უნდა იყოს „ღამურების“ კარის დარაჯი. რამდენიმე გამოცემის ცნობით, ბორდალასმა გიორგის შანსი მომავალშიც უნდა მისცეს.
