სივასპორთან განმეორებით მატჩამდე სამტრედიამ ბათუმს მატჩის გადადებაზე უარი უთხრა
კონფერენს ლიგის მესამე საკვალიფიკაციო ეტაპის პირველი მატჩი ბათუმში, ბათუმი არენაზე შედგა, სადაც „დინამო" ბათუმმა თურქულ „სივასპორს" უმასპინძლა. შეხვედრაში 3 გოლი გავიდა და „სივასპორის" სასარგებლოდ, ანგარიშით - 1-2 დასრულდა. სამწუხაროდ, „სივასპორმა" აჭარულ გუნდს გამარჯვების გოლი შეხვედრის ბოლო წუთის მიმდინარეობისას გაუტანა.
გუნდების განმეორებითი შეხვედრა 12 აგვისტოს შედგება და 22:00 საათიდან დაიწყება. ამ წყვილში ყველაფერი სწორედ აღნიშნული შეხვედრის შემდეგ გადაწყდება.
საქართველოს კრისტალბეთ ეროვნული ლიგა ხვალ, 22-ე ტურის მატჩებით უნდა განახლდეს, უშუალოდ, „დინამო" ბათუმს კი მომდევნო მატჩი 8 აგვისტოს, ბათუმი არენაზე აქვს ჩანიშნული. საინტერესოა, რომ კონფერენს ლიგის მესამე საკვალიფიკაციო ეტაპის საპასუხო, უმნიშვნელოვანესი მატჩის წინ, საქართველოს კრისტალბეთ ეროვნული ლიგის კალენდარში ცვლილებები არ შევიდა - აჭარული გუნდი 8 აგვისტოს უმაღლესი ლიგის მატჩს გამართავს და შეხვედრა არ გადაიდება. ამის მიზეზი აუტსაიდერი „სამტრედიაა" - გუნდმა მატჩის გადადებაზე უარი განაცხადა.
„8-ში, სამტრედიას წინააღმდეგ, მატჩს ჩვეულებრივ ჩავატარებთ. ვეცდებით ძალები აღვიდგინოთ , გავიდეთ, ვითამაშოთ და მაქსიმუმი გავაკეთოთ", - ასე უპასუხა „დინამო" ბათუმის მთავარმა მწვრთნელმა, გია გეგუჩაძე მედიის კითხვას.
8 აგვისტოს, „დინამო" ბათუმისა და „სამტრედიას" მატჩი 21:00 საათიდან დაიწყება.
შეხვედრაზე დასასწრები ბილეთების შეძენა შესაძლებელია ონლაინ, შემდეგ ბმულზე - ბილეთების ყიდვა.
ინფორმაციისთვის გეტყვით, რომ გასული, 21 ტურის შემდეგ, 42 ქულით საქართველოს კრისტალბეთ ეროვნულ ლიგას სწორედ „დინამო" ბათუმი ლიდერობს, ხოლო „სამტრედიას" 10 ქულა აქვს და უმაღლესი ლიგის გამოკვეთილი აუტსაიდერია - ამ ეტაპზე, „სამტრედია" მეორე ადგილოსან „თელავს" 9 ქულით ჩამორჩება.