11, 7, 7 - შენგელიას ბრწყინვალე მატჩი და ცსკა-ს მორიგი გამარჯვება ფენერბაჰჩესთან
თორნიკე შენგელიას ცსკა-მ ევროლიგის პლეიოფის ეტაპზე მორიგი შეხვედრა გამართა და „ფენერბაჰჩე“ მეორე დაპირისპირებაშიც დაამარცხა.
„არმიელებმა“ პირველი მეოთხედი 2 ქულით წააგეს, თუმცა მეორე ათწუთეულში 27 ქულა ჩააგდეს და დიდ შესვენებაზე 8 ქულიანი უპირატესობით გავიდნენ. თურქულმა კლუბმა მესამე მეოთხედი 13-10 მოიგო, მაგრამ ცსკა-ს ქომაგებს მაინც არ უნერვიულიათ და ბრწყინვალე მეოთხე პერიოდის შემდეგ, მათმა გუნდმა 78-67 იმარჯვა.
თორნიკე შენგელიამ მატჩი ძირითად შემადგენლობაში დაიწყო და პარკეტზე 32 წუთ-ნახევარზე ოდნავ მეტი გაატარა. თოკო თავის გუნდში ერთ-ერთი საუკეთესო იყო და 11 ქულა, 7 მოხსნა, 7 შედეგიანი გადაცემა, 2 ჩაჭრა და 1 დაფარება მიითვალა.
ДААААААААААА! Делаем счёт в серии 2:0 ????
— CSKA Moscow (@cskabasket) April 23, 2021
????
Дани Хэкетт: 14 очков, 9 передач, 4 подбора@TokoShengelia23: 11 очков, 7 подборов, 7 передач
Никита Курбанов: 10 очков, 6 подборов#CSKAbasket pic.twitter.com/REC27CZ0XL
შენგელიამ 8-დან 5 ორიანი ჩააგდო, 1 სამიანი გააფუჭა და 2-დან 1 საჯარიმო გამოიყენა. როგორც ქულების, ისე სარგებლიანობის კოეფიციენტის მხრივ, საქართველოს ნაკრების კაპიტანი თავის გუნდში მხოლოდ დენიელ ჰეკეტს ჩამორჩა. ამ უკანასკნელმა 14 ქულა მიითვალა და მისი სარგებლიანობის კოეფიციენტი 26 გახლდათ, თოკოსი - 22.
ცნობისთვის, ცსკა-ს მომდევნო ეტაპის საგზურის მოსაპოვებლად კიდევ ერთი გამარჯვება სჭირდება და „არმიელები“ „ფენერთან“ მომდევნო შეხვედრას 28 აპრილს გამართავენ.