ბრედლი ბილის 60-ქულიანი ბრწყინვალება - ვაშინგტონმა ფილადელფიასთან მაინც წააგო
„ვაშინგტონ უიზარდსის“ სუპერვარსკვლავი, ბრედლი ბილი მიმდინარე სეზონში სტეფ კარის შემდეგ მეორე კალათბურთელი გახდა, რომელმაც მატჩი მინიმუმ 60 ქულით დაასრულა. 27 წლის მსროლელმა „ფილადელფია სევენთი სიქსერსის“ წინააღმდეგ გაიბრწყინა და აქტივში 60 ქულა, 7 მოხსნა, 5 ასისტი და 1 ჩაჭრა ჩაიწერა.
6️⃣0️⃣ points for Bradley Beal tonight, which ties a franchise record ???? #WizSixers | @RealDealBeal23 pic.twitter.com/GabazNAEN1
— Washington Wizards (@WashWizards) January 7, 2021
„ვაშინგტონის“ ლიდერმა კალათში 35-დან 20 ბურთი მოათავსა, 7 სამქულიანი გაიფორმა და 15-დან მხოლოდ 2 საჯარიმო გააფუჭა. აღსანიშნავია, რომ 3 მეოთხედის შემდეგ, მას 57 ქულა ჰქონდა და გადამწყვეტ თორმეტწუთეულში მხოლოდ 3 ქულას დასჯერდა.
ბილი „უიზარდსის“ ისტორიაშიც შევიდა. მან გილბერტ არენასის რეკორდი გაიმეორა, რომელსაც აქამდე „ვაშინგტონის“ მაისურით ერთ თამაშში ყველაზე მეტი ქულა ჰქონდა ჩაგდებული. გარდა ამისა, „დიდმა პანდამ“ არენასს „უიზარდსის“ რიგებში გაფორმებული 50-ქულიანი მატჩებით გადაასწრო.
Bradley Beal has a career-high 57 PTS in 3Qs pic.twitter.com/FSzJKiaD7d
— Bleacher Report NBA (@BR_NBA) January 7, 2021
ბილის ფენომენალური ასპარეზობის მიუხედავად, „ვაშინგტონმა“ „ფილადელფიას“ მაინც ვერაფერი მოუხერხა და 141-136 დამარცხდა. „სევენთი სიქსერსის“ მხრიდან მინიმუმ 15 ქულა 6-მა კალათბურთელმა დააგროვა, საუკეთესო კი ჯოელ ემბიდი იყო, რომელმაც მატჩი 38 ქულითა და 8 მოხსნით დაასრულა. სეთ კარიმ თავი 28 ქულასა და 5 მოხსნას მოუყარა, ხოლო ტობაიას ჰერისი და შეიკ მილტონი 19-19 ქულას დასჯერდნენ.
ვაშინგტონელებიდან ბილს 20 ქულით, 12 ასისტითა და 8 მოხსნით რასელ უესტბრუკი წაეხმარა. დავის ბერტანსმა გუნდს 17 ქულა შესძინა, ტომას ბრაიანტმა კი 11 ქულა და 6 მოხსნა გააკეთა.