კვლავ სეტის წაუგებლად! - ნადალის 1/2 ფინალური ბარიერი ციციპასია...
რაფაელ ნადალი ავსტრალიის ღია პირველობის მე-2 ნახევარფინალისტი გახდა და აღნიშნულ სტადიაზე ბერძენ სტეფანოს ციციპასს დაუპირისპირდება.
ესპანელმა ლეგენდამ, რომელსაც მიმდინარე ტურნირზე სეტი არ წაუგია, ამერიკელ ფრანსის ტიაფოსთან შეხვედრა სრული დომინაციის ფონზე ჩაატარა და მეტოქეს იოლად აჯობა - 6:3; 6:4; 6:2. ტიაფო დიდი სლემის ტურნირის 1/4 ფინალში პირველად თამაშობდა და ტურნირზე განუთესავი იყო.
"კვლავ ამ ტურნირის 1/2 ფინალში გასვლა, ჩემთვის ყველაფერს ნიშნავს. ამ კორტზე თამაშის შესაძლებლობა კი ყოველთვის განსაკუთრებულია". - განაცხადა მოკლედ ნადალმა.
რაფაელ ნადალი ავსტრალიის ღია პირველობის 2009 წლის გათამაშების გამარჯვებულია. იგი ტურნირის შემდეგ რაუნდში შესანიშნავ ფორმაში მყოფ ციციპასს შეხვდება, რომელიც მელბურნის კორტებზე თავს ბრწყინვალედ წარმოაჩენს.