ბასილაშვილმა წყვილები გამარჯვებით დაიწყო, დღეს კი ერთეულთა შორის ითამაშებს...
მსოფლიოს 31-ე ჩოგანი, ნიკოლოზ ბასილაშვილი საფრანგეთის ქალაქ მეცში იმყოფება და იქაურ 250-იან ტურნირზე მონაწილეობს. ბასილაშვილი ერთეულთა შორის მე-5 ნომრადაა განთესილი, იგი ასევე თამაშობს წყვილთა თანრიგშიც.
ქართველმა და მისმა მეწყვილემ, რადუ ალბოტმა გუშინ 1/8 ფინალური შეხვედრა ჩაატარეს და ფრანგულ დუეტს - უმბერი/ცონგას 3 სეტში - 5:7; 6:4; 10:8 მოუგეს.
დღეს, ბასილაშვილი ერთეულთა შორის ითამაშებს და კიდევ ერთ ადგილობრივს, კენი დე შეპერს დაუპირისპირდება. დე შეპერი ვეტერანია და განსაკუთრებული სათამაშო დონისთვის არასდროს მიუღწევია, ამჟამად კი მსოფლიო რეიტინგის 186-ე საფეხურზეა.
ამ ყველაფრის მიუხედავად, შანსები თითქმის თანაბრად ფასდება, რაც ცოტა გასაკვირია. თამაში დახურულ დარბაზში გაიმართება და თბილისის დროით, დაახლოებით, 16:00 საათზე დაიწყება.