ზვერევი მაიამის მასტერსის ფინალში ისნერს შეხვდება
20 წლის გერმანელი ჩოგბურთელი ალექსანდრ ზვერევი, მაიამის ტურნირის გადამწყვეტ შეხვედრაში ადგილობრივი ჯონ ისნერის წინააღმდეგ ითამაშებს.
ზვერევმა 1/2 ფინალური დაპირისპირება ესპანელ პაბლო კარენო-ბუსტას, 1 საათსა და 28 წუთში, 7:6, 6:2 მოუგო.
გერმანელი დამაჯერებლად აწვდიდა და მეტოქისათვის 1 ბრეიკ-პოინტიც არ მიუცია, რაც იმის დამსახურებაც გახლდათ, რომ ალექსანდრს პირველი მოწოდება წაუვიდა და 58 შესაძლებლობიდან 40-ჯერ ბურთი ზუსტად ჩააწოდა - 69%.
ზვერევის ანგარიშზე 30 ვინერსი და 21 უნებლიე შეცდომა იყო, რასაც 10 ეისი და 2 ორმაგი შეცდომაც დაემატა.
ალექსანდრ ზვერევი სატიტულო შეხვედრაში ჯონ ისნერს შეხვდება, რომელსაც მასტერსის სერიის ტურნირთა წინა 3 ფინალი წაგებული აქვს. ფინალური მატჩი კვირას, თბილისის დროით 21:00 საათზე დაიწყება.
შეგახსენებთ, რომ ზვერევი, ნოვაკ ჯოკოვიჩის შემდეგ ყველაზე ახალგაზრდა ჩოგბურთელია, რომელმაც მასტერსის სერიის ტურნირი მოიგო. მან გასულ სეზონში ჯერ რომის კორტებზე იმარჯვა, ხოლო მოგვიანებით წარმატებას მონრეალშიც მიაღწია.