„ალისონი გუნდს კიდევ დიდი ხნით დასჭირდება“ - დევიდ ჯეიმსი

„ლივერპულის“ ყოფილ მეკარეს, დევიდ ჯეიმსს მიაჩნია, რომ ალისონ ბეკერი კვლავ ძალიან მაღალ დონეზე თამაშობს და შესაბამისად, მომავალ ზაფხულს მიმდინარე ხელშეკრულების ამოწურვამდე, მას კონტრაქტის გახანგრძლივება უნდა შესთავაზონ. ვეტერანი ინგლისელი Liverpool.com-ს ესაუბრა და ასევე, ახალ სეზონში კლუბისგან მოლოდინებზეც გაამახვილა ყურადღება.

რას ამბობს ჯეიმსი:

„ვფიქრობ, „ლივერპულმა“ მას კონტრაქტი აუცილებლად უნდა გაუხანგრძლივოს. ალისონი უკვე არაერთი წელია ლიგაში ჩემი საყვარელი მეკარეა და გუნდს ზურგს უკან სჭირდება ისეთი ადამიანი, ვისი იმედიც ექნება.

თუმცა, მისი კონტრაქტის საკითხი რაც შეიძლება მალე უნდა მოგვარდეს. ბოლო წლებში ჩვენ ვნახეთ „ლივერპულის“ ფეხბურთელები, რომლებსაც ხელშეკრულება ამოეწურათ და კლუბი უფასოდ დატოვეს. არა მგონია, მათ ამის დაშვება ალისონის შემთხვევაშიც შეეძლოთ.

ვფიქრობ, სეზონის პირველმა მატჩმა, რომელიც კევინ კიგანის გარდაცვალების შემდეგ „ნიუკასლთან“ სტუმრად გაიმართა, ორივე გუნდის გაცილებით მეტ მოთამაშეზე იმოქმედა, ვიდრე ეს ხალხს ჰგონია.

ნამდვილად ვფიქრობ, რომ კვირას „ლივერპულის“ თამაშში ბევრი ისეთი რამ იყო, რის გამოც კმაყოფილები უნდა ვიყოთ. ვფიქრობ, ამ სეზონში მოლოდინები უფრო დაბალია, რადგან გასული სეზონისგან განსხვავებით, ახლა ისინი პრემიერ ლიგის მოქმედი ჩემპიონები არ არიან.

ასევე მიმაჩნია, რომ სანამ ხალხი „ლივერპულის“ განსჯას დაიწყებს, გუნდს გარკვეული საშეღავათო პერიოდი ეკუთვნის, რადგან მათ რამდენიმე საკვანძო მოთამაშე დაკარგეს და ახალი მწვრთნელი ჰყავთ.

ისინი პრემიერლიგის ტიტულისთვის ბრძოლას ისახავენ მიზნად, თუმცა მიმაჩნია, რომ ჩემპიონთა ლიგაზე მოხვედრა აუცილებელი პირობაა. თუ ამასთან ერთად, შორს წასვლას და შიდა თასებსა თუ ჩემპიონთა ლიგაზე ბრძოლას შეძლებენ, ეს შესანიშნავი იქნება.

„ლივერპულის“ ფანები და კლუბის ხელმძღვანელობა ტიტულებს ითხოვენ. ისინი ელიან, რომ ამ სეზონში გუნდი უძლიერესებს გაუწევს კონკურენციას.

ანდონი ირაოლას მხოლოდ ორწლიანი კონტრაქტი აქვს, რაც ჩემთვის იმაზე მეტყველებს, რომ კლუბი მოქნილობის შენარჩუნებას ცდილობს. თუ მომდევნო ორი სეზონის განმავლობაში ისინი ირაოლას ხელმძღვანელობით წარმატებას მიაღწევენ, მას ხელშეკრულებას გაუხანგრძლივებენ, წინააღმდეგ შემთხვევაში კი, მასთან დამშვიდობებას შეძლებენ.

ტიტულებისთვის ბრძოლა და ყველა ტურნირზე სტაბილურობის შენარჩუნება ძალიან მნიშვნელოვანია „ლივერპულისა“ და ირაოლას მომავლისთვის“.

პრემიერ ლიგის პირველ ტურში „ლივერპულმა“ სტუმრად „ნიუკასლთან“ ფრედ, 2:2 ითამაშა. მერსისაიდული გუნდის კარს კვლავ ალისონ ბეკერი იცავდა, გიორგი მამარდაშვილი კი სათადარიგოთა სკამზე იყო.

ანდონი ირაოლას გუნდი მეორე ტურში საკუთარ მოედანზე „ნოტინგემს“ დაუპირისპირდება. მატჩი 29 აგვისტოს, საქართველოს დროით 15:30 საათზე გაიმართება.