საქართველოს თასი - რუსთავმა სპაერს მოუგო და 1/4-ფინალში გავიდა

საქართველოს დავით ყიფიანის სახელობის თასის მერვედფინალში ერთმანეთს რუსთავი და სპაერი დაუპირისპირდნენ. გამარჯვება გია ცეცაძის გუნდს დარჩა, რომელმაც 3:1 მოიგო.

აღსანიშნავია, რომ ანგარიში ანზორ კიღურაძის შეგირდებმა გახსნეს. მე-6 წუთზე თავი პენალტის ნიშნულიდან სამხარაძემ გამოიჩინა.

ამის შემდეგ, უპირატესობას რუსთავი დაეუფლა. 31-ე წუთზე მსაჯმა მოედნიდან ასკურავა გააძევა, რის შემდეგაც ცეცაძის გუნდის უპირატესობა კიდევ უფრო გაიზარდა.

34-ე წუთზე იუტა ნაკანომ წონასწორობა აღადგინა და პირველი ტაიმი ფრედ 1:1 დასრულდა. მეორე ნახევარში კვლავ რუსთავის უპირატესობა ვიხილეთ, თუმცა ძირითად დროში მეტი გოლი აღარ გასულა.

გამარჯვებულის გამოსავლენად დამატებითი ტაიმები გახდა საჭირო, სადაც 102-ე წუთზე სოლომონ კესიმ გაიტანა და რუსთავი დააწინაურა. მატჩის საბოლოო შედეგი კი 114-ე წუთზე კიდევ ერთმა ლეგიონერმა, კევინ სეიხასიმ დააფიქსირა.

ცნობისთვის, საქართველოს დავით ყიფიანის სახელობის მეოთხედფინალში რუსთავის გარდა ამ მომენტისთვის ქუთაისის ტორპედო და წყალტუბოს სამგურალი გავიდნენ.