გორდეზიანს ახალი გუნდი ჰყავს - ქართველი ფორვარდი საბერძნეთის მეორე ლიგაში
საბერძნეთის საფეხბურთო კლუბმა „პანთრაკიკოსმა“ ქართველი თავდამსხმელის, ვასილიოს გორდეზიანის ტრანსფერი ოფიციალურად დაადასტურა.
24 წლის ფორვარდი ბოლოს საბერძნეთის მეორე დივიზიონში, „ელას სიროსში“ ასპარეზობდა, სადაც 11 მატჩში 3 გოლი გაიტანა, მანამდე კი თბილისის „დინამოს“ და ბოსნიური „სარაევოს“ ღირსებას იცავდა.
რაც შეეხება მის ახალ კლუბს, „პანთრაკიკოსი“ მეორე ლიგაში 9-წლიანი პაუზის შემდეგ დაბრუნდა.
საქართველოს 21-წლამდე ნაკრებში გორდეზიანმა 14 მატჩში 3 გოლი გაიტანა და 1 საგოლე პასი შეასრულა. აღსანიშნავია მისი გოლი ევროპის 21-წლამდე ჩემპიონატის ფინალურ ეტაპზე პოლონეთის წინააღმდეგ, როდესაც მოედანზე ცვლილებაზე გამოვიდა და გუნდს 3 ქულა მოუპოვა.
