ოლისე ან კვარა? - თუ რეალი ვინისიუსს ვერ შეუთანხმდება

ვინისიუს ჟუნიორს მადრიდის „რეალთან“ კონტრაქტი 2027 წელს უსრულდება და თავისუფალი აგენტი ხდება. ამ დრომდე, „სამეფო კლუბი“ მასთან ახალი ხელშეკრულების გაფორმებას ვერ ახერხებს.

მხარეები ფინანსურ დეტალებზე ვერ თანხმდებიან. მიმდინარე მუნდიალზე „ვინის“ ბრწყინვალე თამაშის ფონზე, ევროპულ პრესაში მორიგი ინფორმაციები გავრცელდა, რომ შესაძლოა ბრაზილიელმა მადრიდი დატოვოს.

ცნობილი ესპანური გამოცემა El Nacional-ი წერს, რომ ვინისიუსის წასვლის შემთხვევაში, „რეალი“ ოლისეს ან კვარაცხელიას შეძენას შეეცდება.

„ვინისიუს ჟუნიორის მომავალი კვლავ ბუნდოვანი რჩება. ამ დროისთვის მადრიდის „რეალთან“ კონტრაქტის განახლებაზე არაფერია ცნობილი, რადგან ფეხბურთელი მთლიანად მსოფლიო ჩემპიონატზეა კონცენტრირებული, სადაც მან საუკეთესო ფორმა დაიბრუნა და ბრწყინვალე მატჩები ჩაატარა. ამან კვლავ წარმოშვა მუდმივი საუბრები მისი შესაძლო წასვლის შესახებ, რადგან ბევრმა კლუბმა კვლავ გამოიჩინა ინტერესი.

„7 ნომრის“ პრიორიტეტი ყოველთვის „სანტიაგო ბერნაბეუზე“ დარჩენა იყო, თუმცა ამის სანაცვლოდ ის ითხოვს მნიშვნელოვან ფინანსურ კომპენსაციას: ხელფასის გაზრდასა და სოლიდურ ბონუსს კონტრაქტის გაფორმებისთვის - 60 მილიონი ევროს ოდენობით. კონტრაქტის განახლება ვინის არ ეჩქარება და იცის, რომ დრო მის სასარგებლოდ მუშაობს, ვინაიდან 2027 წელს თავისუფალი აგენტი ხდება. ყოველი შემთხვევისთვის, კლუბში უკვე დაიწყეს ფიქრი ბრაზილიელი ვარსკვლავის გარანტირებული შემცვლელის პოვნაზე და მაგიდაზე ორი სახელი დევს, რომელთაგან პირველი მაიკლ ოლისეა.

ჟოზე მოურინიოსთვის ყოფილი „ფლამენგოელის“ დაკარგვა, რომელიც პროექტის ერთ-ერთი მთავარი საყრდენია, საშინელი დარტყმა იქნება, და მათ მოუწევთ პლანეტის ერთ-ერთი საუკეთესო მოთამაშის გაფორმება, რათა შეავსონ ის უზარმაზარი სიცარიელე, რაც დარჩება. ვერავინ უარყოფს, რომ მიუნხენის „ბაიერნის“ ვარსკვლავი სენსაციური ვარიანტია მისი შთამბეჭდავი ნიჭისა და პოტენციალის წყალობით, რაც მას დღეს ბაზარზე ერთ-ერთ ყველაზე სასურველ მოთამაშედ აქცევს. პრობლემა ისაა, რომ ის არ იყიდება.

Bild-ი ამტკიცებს, რომ „რეალმა“ ბედი რამდენიმე კვირის წინ სცადა და 2001 წელს დაბადებულ შემტევში 150 მილიონი ევრო შესთავაზა, თუმცა „ალიანც არენამ“ მის ტრანსფერზე კარები სრულად ჩაკეტა. ეს ნიშნავს, რომ მათ მოუწევთ სხვა ვარიანტებზე ფიქრი, თუ ბავარიელები თავიანთ პოზიციაზე მყარად დარჩებიან და მოლაპარაკებებზე უარს იტყვიან. შესაბამისად, ხვიჩა კვარაცხელიაზე (ჩემპიონთა ლიგის ბოლო გათამაშების MVP-ზე) ფსონის დადების ვარიანტმაც ძალა მოიკრიბა.

ის ლუის ენრიკესთვის შეუცვლელი ფიგურაა „პარი სენ-ჟერმენში“ გადმოსვლის დღიდანვე, თუმცა თავის როლთან დაკავშირებით შესაძლოა ეჭვები გაუჩნდეს იმ შემთხვევაში, თუ იან დიომანდესა და მაგნეს აკლიუშის ტრანსფერები დადასტურდება. გარდა ამისა, საუბარი იყო „პარკ დე პრენსზე“ თავად „ვინის“ შესაძლო გადასვლაზეც.

მაგრამ ზედმეტია იმის თქმა, რომ „რეალი“ კვარაცხელიას ტრანსფერის დახურვისას იმავე ან კიდევ უფრო მეტ სირთულეს წააწყდება. ნასერ ალ-ხელაიფის მოლაპარაკებები არ სურს და „Le Parisien“-ის თანახმად, მხოლოდ ოპერაციაში ვინისიუსის ჩართვა აიძულებს მას აზრის შეცვლაზე დაფიქრდეს“.

- წერს ესპანური გამოცემა.