კამპ ნოუ ჩემპიონთა ლიგის ფინალს უმასპინძლებს? ბარსამ ოფიციალური განაცხადი წარადგინა

FC კატალონიის ბარსელონამ, ოფიციალურად წარუდგინა UEFA-ს განაცხადი 2029 წლის ჩემპიონთა ლიგის ფინალის მასპინძლობაზე.

კლუბის მიერ გაგზავნილი დოსიე მოიცავს UEFA-ს მიერ მოთხოვნილ ყველა ტექნიკურ, სახელშეკრულებო და ინსტიტუციურ მოთხოვნას, ასევე გარანტიებს, რომლებიც ადასტურებს როგორც Spotify Camp Nou-ს, ისე ქალაქ ბარსელონას მზადყოფნას მსოფლიოს ერთ-ერთი ყველაზე მნიშვნელოვანი სპორტული ღონისძიების მასპინძლობისთვის.

განაცხადის წარდგენით ოფიციალური საკანდიდატო პროცესი დასრულდა. ახლა UEFA სხვადასხვა კანდიდატურების შეფასების ეტაპზე გადავა და საბოლოოდ გადაწყვეტს, რომელი სტადიონი უმასპინძლებს 2029 წლის ჩემპიონთა ლიგის ფინალს.

ბარსელონას განაცხადში ხაზგასმულია ქალაქის მრავალწლიანი გამოცდილება საერთაშორისო მასშტაბის ღონისძიებების ორგანიზებაში, ხოლო განახლებული Spotify Camp Nou წარმოდგენილია როგორც მსოფლიო დონის არენა.

სტადიონი, რომელიც მასშტაბურ რეკონსტრუქციას გადის, დასრულების შემდეგ მსოფლიოში ერთ-ერთი ყველაზე თანამედროვე, ინოვაციური და გამორჩეული სპორტული კომპლექსი იქნება. ამასთან, UEFA-ს კლასიფიკაციით ის ისტორიულად უმაღლესი კატეგორიის სტადიონად ითვლება და ტევადობით ევროპის ყველაზე დიდი საფეხბურთო არენაა.

ბარსელონა და პროექტში ჩართული ყველა ინსტიტუცია ახლა UEFA-ს საბოლოო გადაწყვეტილებას ელოდება. 2029 წლის ჩემპიონთა ლიგის ფინალის მასპინძლის ვინაობა მიმდინარე წლის ბოლოს გახდება ცნობილი.