ქორწილში იყო, პასპორტი მეგობრებმა ჩაუტანეს | ედერსონის ისტორია
ბრაზილიის ნაკრების სამუნდიალო განაცხადში ცვლილებაა. ტრავმირებული ვესლის ნაცვლად კარლო ანჩელოტიმ „ატალანტას“ ფეხბურთელი, ედერსონი, გამოიძახა, რაც მისთვის ძალიან დიდი მოულოდნელობა აღმოჩნდა.
ედერსონი გაფართოებულ, 55-კაციან შემადგენლობაში მოხვდა, მაგრამ იმედი აღარ ჰქონდა, რომ მსოფლიო ჩემპიონატზე წასვლის შანსი მიეცემოდა. სწორედ ამიტომ მშობლიურ ქალაქში, კამპუ-გრანდეში, ჩავიდა და შაბათს „ტიგრესის“ ფეხბურთელის, რომულოს, ქორწილში იმყოფებოდა.
ედერსონმა პასპორტი რიო-დე-ჟანეიროში დატოვა და შოკში ჩავარდა, როდესაც კვირას დილით მისი გამოძახება გამოცხადდა. ედერსონმა მეგობრებს სთხოვა, პასპორტი მისთვის სან-პაულუში მიეტანათ, საიდანაც ის აშშ-ში გამგზავრებას აპირებდა. ბარგის ჩალაგება და ტანსაცმლის შეძენა საკუთარ თავზე მისმა მეუღლემ აიღო.
ედერსონი კამპუ-გრანდედან სან-პაულუში გაემგზავრა. იქ თავის მეგობრებს შეხვდა და აშშ-ში კვირას ღამით გაფრინდა. ედერსონი ბრაზილიის ნაკრებს ორშაბათ დილას შეუერთდა და პირველ ვარჯიშს უახლოეს საათებში გამართავს.
