„ბევრს მუშაობს და სწრაფია“ | სენტ-ეტიენის ექს-მოთამაშემ ზურიკო შეაქო

„სენტ-ეტიენის“ ყოფილმა ფეხბურთელმა, პასკალ ფეინდუნომ ზურიკო დავითაშვილი შეაქო. ფეინდუნო გამოცემა Top Mercato-ს ესაუბრა და განაცხადა, რომ ლიგა 1-ში დასაწინაურებლად სწორედ ზურიკოსნაირი მოთამაშეა საჭირო.

„ზურიკოს სტილი ძალიან მომწონს. შეუპოვარია, ბევრს მუშაობს და სისწრაფითა და ოსტატურობით გამოირჩევა. ლიგა 1-ში დასაწინაურებლად საჭიროა, გყავდეს ფეხბურთელები, რომლებიც სეზონში მინიმუმ 15 გოლს გაიტანენ. „სენტ-ეტიენს“ ზურიკოს სახით სწორედ ასეთი მოთამაშე ჰყავს.

„სენტ-ეტიენის“ ახალი მთავარი მწვრთნელი, ფილიპ მონტანიე, ძალიან მომწონს. ის გამოცდილი სპეციალისტია, რომელიც ფრანგულ ფეხბურთს კარგად იცნობს. მას ლიგა 1-სა და ლიგა 2-ში უმუშავია და მისი სათამაშო სტილი მომწონს. ვფიქრობ, მას ყველა უნარი აქვს, რათა „სენტ-ეტიენი“ უმაღლეს დივიზიონში დააბრუნოს.“

ცნობისთვის, ლიგა 2-ის 26 ტურის შემდეგ „სენტ-ეტიენს“ 49 ქულა აქვს და სატურნირო ცხრილში მეორე პოზიციას იკავებს. „მწვანეები“ „ტრუას“ ორი ქულით ჩამორჩებიან, ხოლო „ლემანს“ ხუთი ქულით უსწრებენ.z