ყველაზე ნიჭიერი ფეხბურთელები მსოფლიოში - ხვიჩა GiveMeSport-ის რჩეულთა სიაშია

გავლენიანმა ბრიტანულმა გამოცემა, Give Me Sport-მა მსოფლიო ფეხბურთში ყველაზე ნიჭიერი ფეხბურთელების თხუთმეტეული გამოაქვეყნა და სიაში ხვიჩა კვარაცხელიაც შეიყვანა.

რას წერს Give Me Sport-ი ხვიჩაზე:

„თანამედროვე ფეხბურთში, ერთ-ერთი ყველაზე ნიჭიერი, ორი ფეხით მოთამაშე ხვიჩა კვარაცხელია, პარი სენ-ჟერმენში გადმოსვლისთანავე გუნდის ლიდერად იქცა. იანვრის სატრანსფერო ფანჯრისას სერია A-ს გიგანტიდან, „ნაპოლიდან“ ტრანსფერის შემდეგ, ქართველმა ფეხბურთელმა მყისვე აჩვენა თავისი კლასი. მისი აზროვნებისა და მოძრაობის სისწრაფის საოცარი კომბინაცია ერთ-ერთი უმთავრესი მიზეზია იმ ბრწყინვალე ფორმისა, რომელსაც პარიზელები ლიგა 1-ში აჩვენებენ და რაც საბოლოოდ ჩემპიონთა ლიგაზე ტრიუმფით დაგვირგვინდა.“

„განსაკუთრებით აღსანიშნავია მისი ასპარეზობა გასულ სეზონში, ჩემპიონთა ლიგის მერვედფინალში „ლივერპულის“ წინააღმდეგ. ორივე შეხვედრაში - როგორც შინ, ისე სტუმრად - მან მეტოქის განაპირა მცველები უმძიმეს მდგომარეობაში ჩააყენა. 24 წლის საქართველოს ნაკრების ფეხბურთელი, რომელსაც უდიდესი პოტენციალი აქვს, საკვანძო ფიგურა გამოდგა პსჟ-სთვის ჩემპიონთა ლიგის მრავალწლიანი „წყევლის“ დასასრულებლად. მისი ტექნიკური არსენალი და ფინტები მარცხენა ფლანგზე მართლაც სანახაობრივია.“

ხვიჩა კვარაცხელიას გარდა, საუკეთესო 15 მოთამაშეს შორის არიან - ვიტინია, მატეუშ კუნია, რაიან შერკი, ლიონელ მესი, ვინისიუს ჟუნიორი, ლამინ იამალი, ნეიმარი, ჯამალ მუსიალა, კილიან მბაპე, უსმან დემბელე, პედრი, კოულ პალმერი, ფლორიან ვირცი და მაიკლ ოლისე.