„რაფინიას დაბრუნება ფანტასტიკური ამბავია“ - ფლიკი

„ალავესთან“ მოგებული მატჩის შემდეგ „ბარსელონას“ მთავარმა მწვრთნელმა, ჰანსი ფლიკმა პრესკონფერენციაზე გუნდისთვის რაფინიას მნიშვნელობაზე ისაუბრა და განაცხადა, რომ მომენტების რეალიზების მხრივ მის ფეხბურთელებს კიდევ მოსამატებელი აქვთ.

„რაფინიასთან ერთად გუნდი უფრო დინამიკურია. ის ჩვენთვის ძალიან მნიშვნელოვანია, ვინაიდან მაღალ ტემპში თამაშობს და როდესაც ის მიდის პრესინგში, ამას დანარჩენებიც აკეთებენ. უახლოეს მატჩებში რაფინია კიდევ უფრო მეტ დროს მიიღებს, მაგრამ მისი დაბრუნება ფანტასტიკური ამბავია.

ჟერარ მარტინი ყოველთვის 100%-ით იხარჯება. ცენტრალური მცველის პოზიციაზე ის თავდაჯერებულად გამოიყურება და შემადგენლობის როტაციის შესაძლებლობას გვაძლევს, რაც ძალიან კარგია.

ჟოან გარსია ყოველთვის კონცენტრირებულია თამაშზე და კარგად ირჩევს პოზიციას. „ბარსელონა“ მისთვის იდეალური ადგილია. მისით კმაყოფილი ვარ.

პირველ ტაიმში ბევრი საგოლე მომენტი გვქონდა, ისევე, როგორც მეორეში. რეალიზება უნდა გავაუმჯობესოთ, თუმცა ბედნიერი ვარ, რომ 3 ქულა ავიღეთ“.

ცნობისთვის, ანგარიში მატჩის დასაწყისშივე „ალავესმა“ გახსნა, თუმცა მალევე პაბლო იბანიესის გოლს ლამინ იამალმა უპასუხა. 26-ე წუთზე დანი ოლმომ „ბლაუგრანა“ დააწინაურა, 90+3 წუთზე კი დუბლი გაიფორმა. „ბარსელონა“ სატურნირო ცხრილის პირველ პოზიციაზე აღზევდა და მომდევნო ტურში მადრიდის „ატლეტიკოს“ დაუპირისპირდება.