„ხვიჩა მხოლოდ ამ შემთხვევაში ითამაშებს“ - სანიოლის და მამარდაშვილის პრესკონფერენცია

ხვალ, საქართველოს ფეხბურთელთა ნაკრები მსოფლიო ჩემპიონატის საკვალიფიკაციო ეტაპის მესამე ტურში ელჩეს სტადიონზე ესპანეთის ეროვნულ ნაკრებს დაუპირისპირდება.

ვინაიდან, რთული მეტეოროლოგიური პრობლემების გამო სტადიონისკენ გადაადგილება გართულება იყო, საქართველოს ნაკრებს მატჩისწინა პრესკონფერენციის ჩატარება დისტანციურად მოუწია. ჟურნალისტების კითხვებს ვილი სანიოლთან ერთად გიორგი მამარდაშვილმაც უპასუხა.

ვილი სანიოლი:

ატმოსფერო ძალიან კარგია. აქ ჩამოსვლა იმიტომ გადავწყვიტეთ, რომ ფეხბურთელებისთვის გამოსაჯანმრთელებლად უფრო დიდი დრო მიგვეცა და რაც შეიძლება ნაკლებად დაღლილიყვნენ. ეს გამართლებული გადაწყვეტილება აღმოჩნდა. რაც შეეხება ხვიჩას, პარი სენ-ჟერმენთან აქტიური კავშირი გვქონდა და გამართლებული იყო, რომ ბოლო შეხვედრაში არ ათამაშეს. მართალია, მას კლუბში ბოლო ვარჯიშები გაუცდა, მაგრამ ახლა გამოჯანმრთელდა და ნაყოფიერი მომზადება გაიარა.

დანაკლისი როგორც ჩვენ, ასევე ესპანელებსაც აქვთ. ხვიჩა ხვალისთვის სრულფასოვნად მზად არის, მაგრამ როგორც კვარა, ისე ყველა ფეხბურთელი მხოლოდ იმ შემთხვევაში ითამაშებს, თუ ყველა ექიმი როგორც ნაკრებიდან, ისე კლუბიდან მწვანე შუქს აუნთებს. გადაწყვეტილებას სწორედ ექიმების რეკომენდაციებით ვიღებთ. რისკი ფეხბურთელის დასაზიანებლად გამართლებული არ არის.

როდესაც ესპანეთზე ვსაუბრობთ, არ უნდა დაგვავიწყდეს პორტუგალიის ნაკრებიც. ორივე მსოფლიოს ერთ-ერთი გამორჩეული გუნდია. ვხვდებით სხვაობას, მაგრამ მნიშვნელოვანია, რომ გუნდებს შორის სხვაობა მინიმუმი იყოს. სამწუხაროდ, ჩაკვეტაძე არ ითამაშებს. როდესაც ბოლოს ესპანეთთან ვითამაშეთ, კიტეიშვილი არ გვყავდა. სამწუხაროდ, ეს ფეხბურთის ნაწილია. მჯერა, რომ ყველა, ვინც ხვალ ითამაშებს, არაფრის შეეშინდება. იმედია, სამომავლოდ ტრავმები მინიმუმამდე იქნება დაყვანილი.

რა თქმა უნდა, ესპანეთი როგორც ჯგუფის მოგების, ისე მსოფლიო ჩემპიონატის მთავარი ფავორიტია. ასევე, თურქეთზეც ვიტყვი, რომ საკმაოდ ძლიერი ნაკრებია. ხვალინდელი შედეგი მნიშვნელოვანი იქნება თურქეთთან შეხვედრისთვისაც.

იამალის არ ყოფნა? ფეხბურთი და სანახაობა ძალიან მიყვარს, ასე რომ მის გამო გული მწყდება. მას წარმატებას ვუსურვებ. მირჩევნია მოედანზე საუკეთესო მოთამაშეები იყვნენ, რადგან ასე ფეხბურთისთვის უკეთესია. თუმცა, სამწუხაროდ, ყოველთვის ისე არ ხდება, როგორც ჩვენ გვინდა.

გიორგი მამარდაშვილი:

ბევრი თამაში ვითამაშეთ ესპანეთთან და დიდი გამოცდილება შევიძინეთ. რთულ თამაში იქნება, რადგან ესპანეთი ძლიერი ნაკრებია, მსოფლიოში ერთ-ერთი საუკეთესო ნაკრებია.

სექტემბრისგან განსხვავებული სიტუაცია მაქვს, რადგან რამდენიმე თამაში ვითამაშეთ. ველოდი შანსს, რომელიც უნდა გამომეყენებინა და ვფიქრობ, ეს შევძელი. ახლა გაცილებით კარგ კონდიციებში ვარ.

არ აქვს მნიშვნელობა, რამდენი ფეხბურთელი აკლია ესპანეთის ნაკრებს. ვინც მათ მაგივრად ითამაშებს, მათაც იგივე ხარისხით შეუძლიათ თამაში. თუ გინდა, რომ კარგ შედეგს მივაღწიოთ, მაშინ ყველა ფეხბურთელს საუკეთესო დღე უნდა ჰქონდეს.

შეგახსენებთ, რომ ესპანეთისა და საქართველოს ნაკრებების დაპირისპირება 11 ოქტომბერს, თბილისის დროით 22:45 საათზე დაიწყება.