მაკკოისტისა და აგბონლაჰორის სიმბოლური ნაკრებები | კვარა ორივემ გამოარჩია

შოტლანდიის ნაკრების ყოფილმა ფეხბურთელმა, ალან მაკკოისტმა და „ასტონ ვილას“ ექს-მოთამაშემ, გაბრიელ აგბონლაჰორმა 2024/25 წლების სეზონი შეაჯამეს. მაკკოისტმა და აგბონლაჰორმა თავიანთი სიმბოლური ნაკრებები შეადგინეს და ტოპ 11-ში ხვიჩა კვარაცხელია ორივე მათგანმა შეიყვანა.

„კარში ჯანლუიჯი დონარუმას ჩავაყენებ. მარჯვენა ფლანგის მცველად ჰაკიმი მეყოლება, მარცხნივ - ნუნუ მენდეში. ცენტრალურ მცველებად ვილიამ პაჩოსა და ვირჯილ ვან დაიკს ავირჩევ. ნახევარდაცვაში ვიტინია და პედრი მეყოლება, მარცხენა ფლანგზე კვარაცხელიას დავაყენებ, ხოლო მარჯვენაზე - მოჰამედ სალაჰს. კილიან მბაპე თავდამსხმელის პოზიციაზე იქნება, ხოლო მის უკან უსმან დემბელეს ვათამაშებ“, - განაცხადა აგბონლაჰორმა.

„მეც დონარუმას ვირჩევ და ვფიქრობ, განაპირა მცველებზე კამათი არაა საჭირო - ჰაკიმი და მენდესი. ცენტრალურ მცველებად ვან დაიკი და მარკინიოსი მინდა. ნახევარდაცვაში, არაფერს ავურევ და პარი სენ-ჟერმენის სამ ფეხბურთელს, ფაბიან რუისს, ვიტინიასა და ჟოაუ ნევეშს ავიყვან. თავდამსხმელებს რაც შეეხებათ, დემბელე, კვარაცხელია და იამალი“, - აღნიშნა მაკკოისტმა.

შეგახსენებთ, რომ კვარაცხელიამ „პარი სენ-ჟერმენთან“ ერთად ჩემპიონთა ლიგა, ლიგა 1 და საფრანგეთის თასი მოიგო. ხვიჩას მომდევნო ტურნირი მსოფლიო საკლუბო ჩემპიონატია, რომელზეც პსჟ 15 ივნისს ჩაერთვება.