შენგელიას 2 ქულა ჰქონდა | ვირტუს ბოლონია სტუმრად ისევ დამარცხდა
თორნიკე შენგელიას „ვირტუს ბოლონია“ „ოლიმპია მილანოსთან“ მესამედ დამარცხდა. იტალიის ჩემპიონატის ფინალურ სერიაში, ქართველი კალათბურთელის გუნდმა საკუთარ კედლებში მოგებული 2 თამაშით ანგარიში გაათანაბრა, თუმცა სტუმრად ისევ წააგო და სერიაში 2:3 მარცხდება.
„ოლიმპია მილანომ“ მატჩი კარგად დაიწყო და პირველი ტაიმი 5 ქულით მოიგო. მე-3 მეოთხედში, მასპინძელთა უპირატესობამ 13 ქულა შეადგინა, თუმცა „ვირტუს ბოლონიამ“ გაქცევა მოაწყო და სხვაობა 2 ქულამდე დაიყვანა. ეს შენგელიას გუნდის მაქსიმუმი აღმოჩნდა და „ოლიმპია მილანომ“ 79:72 იმარჯვა.
ქართველ კალათბურთელს ცუდი მატჩი ჰქონდა. შენგელიამ პარკეტზე 21 წუთი გაატარა და აქტივში 2 ქულა, 3 მოხსნა, 1 შედეგიანი გადაცემა და ამდენივე ჩაჭრა ჩაიწერა. თორნიკემ 6-დან 1 ორქულიანი ჩააგდო და 1 სამიანი გააცუდა.
ამრიგად, „ოლიმპია მილანოს“ ჩემპიონობის გაფორმება მომდევნო შეხვედრაში შეეძლება, რომელსაც სტუმრად გამართავს. ფინალური სერიის მე-6 მატჩი 21 ივნისსაა ჩანიშნული და თბილისის დროით, 22:30-ზე დაიწყება.