საკუთარი სამწვრთნელო შტაბით უკმაყოფილო იყო - რონალდუს ალ-ნასრიმ თასზე წააგო

კრიშტიანუ რონალდუს „ალ-ნასრი“ საუდის არაბეთის თასისთვის ბრძოლას გამოეთიშა. ტურნირის ნახევარფინალში, პორტუგალიელი სუპერვარსკვლავის გუნდი „ალ-ვეჰდას“ დაუპირისპირდა და მინიმალური ანგარიშით დამარცხდა - 0:1.

შეხვედრის ერთადერთი გოლი 23-ე წუთზე გავიდა და მისი ავტორი ჟან-დავიდ ბოგელია. რონალდუმ მატჩი სრულად ჩაატარა და მოედანი შედეგიანი ქმედების გარეშე დატოვა. შეხვედრის შემდეგ, სოციალურ ქსელებში ვიდეო გავრცელდა, რომელზეც ჩანს, რომ კრიშტიანუ საკუთარი სამწვრთნელო შტაბის მისამართით უკმაყოფილებას გამოხატავს.

رونالدو يتهاوش مع المدرب ???????? pic.twitter.com/jbkcjQRPye

— بندر الوقيت (@ban_hfc) April 24, 2023

ცნობისთვის, არის შანსი, პორტუგალიელი მიმდინარე სეზონში ტიტულის გარეშე დარჩეს. თასის გარდა, მისი გუნდი სუპერთასისთვის ბრძოლასაც გამოეთიშა და საუდის არაბეთის ჩემპიონატში მეორე ადგილზე იმყოფება. „ალ-ნასრი“ „ალ-იტიჰადს“ 3 ქულით ჩამორჩება და მასზე ერთით მეტი მატჩი აქვს ჩატარებული.

პორტუგალიელი სუპერვარსკვლავის სტატისტიკას რაც შეეხება, რონალდუს 4 აპრილის შემდეგ არ გაუტანია და ბოლო 3 შეხვედრაში, შედეგიანი ქმედება არ ჰქონია. მიმდინარე სეზონში მან 14 მატჩი ჩაატარა და მის ანგარიშზე 11 გოლი და 2 ასისტია.