ლოჩოშვილი ტრავმის გამო შეცვალეს - კრემონეზემ ემპოლის მოუგო
სერია A-ს 30-ე ტურში, ლუკა ლოჩოშვილის „კრემონეზე“ „ემპოლის“ საკუთარ კედლებში დაუპირისპირდა. ქართველი ფეხბურთელის გუნდმა მინიმალური ანგარიშით, 1:0 იმარჯვა და მიმდინარე სეზონში ზედიზედ ორი შეხვედრა პირველად მოიგო.
„კრემონეზემ“ ერთადერთი გოლი მე-4 წუთზე გაიტანა. ლეონარდო სერნიკოლას გადაცემით სირილ დესერსმა ისარგებლა და საკუთარი გუნდი დააწინაურა. „ემპოლის“ წონასწორობის აღდგენის რამდენიმე შანსი ჰქონდა, მაგრამ არაფერი გამოუვიდა და მიმდინარე სეზონში მე-12 მარცხი იწვნია.
ლოჩოშვილმა მატჩი ძირითად შემადგენლობაში დაიწყო და პირველ ნახევარში კარგი შთაბეჭდილება დატოვა. სამწუხაროდ, მეორე ტაიმის 49-ე წუთზე, ქართველმა ფეხბურთელმა თამაშის გაგრძელება ვერ შეძლო. ლუკამ ფეხი იტკინა და ცვლილება მოითხოვა. ჯერჯერობით უცნობია, მისი ტრავმა რამდენად მძიმეა და რამდენ ხანს იუქმებს.
„ემპოლისთან“ აღებული 3 ქულის შემდეგ, „კრემონეზეს“ 19 ქულა აქვს და სატურნირო ცხრილის მე-19 პოზიციას იკავებს. „კრემო“ მე-17 ადგილზე მყოფ „სპეციას“ 7 ქულით ჩამორჩება და უმაღლეს დივიზიონში ადგილის შენარჩუნება ძალიან გაუჭირდება, თუმცა ეს გამარჯვება ნიშანი იყო იმისა, რომ ლოჩოშვილი და კომპანია დანებებას არ აპირებენ. „კრემონეზე“ მომდევნო შეხვედრას 23 აპრილს, „უდინეზეს“ წინააღმდეგ გამართავს.