პერუს ნაკრების მოთამაშეებსა და ესპანურ პოლიციას შორის ფიზიკური დაპირისპირება მოხდა
პერუს საფეხბურთო ნაკრები ესპანეთში იმყოფება, სადაც დღეს, თბილისის დროით, 23:30-ზე, მაროკოს ეროვნული გუნდის წინააღმდეგ ამხანაგურ მატჩს გამართავს. რამდენიმე საათის წინ, „თეთრ-წითლების“ ფეხბურთელებსა და ესპანურ პოლიციას შორის კონფლიქტი მოხდა და ისინი ერთმანეთს ფიზიკურად დაუპირისპირდნენ.
პერუელი ჟურნალისტების ინფორმაციით, ესპანეთში ჩასულ ფეხბურთელებს გულშემატკივრები დახვდნენ და ნაკრების მოთამაშეებმა მათთან მიახლოება გადაწყვიტეს, რის უფლებაც სამართალდამცველებმა არ მისცეს, რადგან პერიმეტრის უსაფრთხოებაზე იყვნენ პასუხისმგებელი. ერთ-ერთ პოლიციელს „სპორტინგ კრისტალის“ ნახევარმცველი, იოშიმარ იოტუნი ქომაგი ეგონა და ხელი ჰკრა, რამაც კონფლიქტის დაწყება განაპირობა.
Vergonzoso incidente entre la Policía española y la selección de Perú cuando los agentes españoles confundieron a los jugadores con aficionados y comenzaron los empujones e insultos.
— León Lecanda (@Leonlec) March 27, 2023
Esto debería traer consecuencias.
pic.twitter.com/QzEIH29nzl
იოტუნმა სამართალდამცველს პასუხი დაუბრუნა, რის შემდეგაც, თანაგუნდელს მეკარე პედრო გალიესე და შემტევი ალექს ვალერა გამოექომაგნენ. პარალელურად, ინციდენტში მონაწილე სამართალდამცველთა რაოდენობაც გაიზარდა და ვითარება უკიდურესად დაიძაბა, თუმცა ფიზიკური დაპირისპირება დიდხანს არ გაგრძელებულა. Marca-ს ინფორმაციით, ესპანელმა სამართალდამცველებმა 4 ფეხბურთელი დააკავეს და ჩვენების მისაცემად განყოფილებაში გადაიყვანეს.
ესპანეთში განვითარებულ მოვლენებს პერუს ფეხბურთის ფედერაცია გამოეხმაურა და საკუთარ ფეხბურთელებს მხარდაჭერა გამოუცხადა. ოფიციალურ განცხადებაში ნათქვამია, რომ ფედერაცია ადგილობრივ სამართალდამცველებთან მაქსიმალურად ითანამშრომლებს, რათა დამნაშავეთა ვინაობა გაირკვეს.
