რა სანქციები ემუქრება ბარსას? | დაქვეითების შანსიც არსებობს

დღეს, ბარსელონას პროკურატურამ სასამართლოში სარჩელი შეიტანა და ადგილობრივ კლუბ „ბარსელონას“ კორუფციაში ადანაშაულებს. როგორც იცით, საქმე კლუბის მიერ ესპანეთის სამსაჯო კომიტეტის ყოფილი ვიცე-პრეზიდენტისთვის, ხოსე მარია ენრიკეს ნეგრეირასთვის გადახდილ ფულს ეხება.

ცნობილმა ესპანურმა გამოცემამ, La Vanguardia-მ ამ თემაზე სტატია გამოაქვეყნა და იმ სასჯელებზე ისაუბრა, რომლებიც ბრალის დამტკიცების შემთხვევაში, შეიძლება, „ბლაუგრანას“ დააკისრონ. La Vanguardia-ს ცნობით, „ბარსას“, როგორც იურიდიულ პირს ჯარიმა ემუქრება და უმაღლესი დივიზიონიდან დაქვეითებისა და კლუბის ლიკვიდაციის ალბათობაც არსებობს.

ესპანელი ექსპერტების იტყობინებიან, რომ „ბარსელონას“ გულშემატკივრებს შეუძლიათ, ამ მომენტისთვის მშვიდად იყვნენ. თუ კატალონიელებს ბრალი დაუმტკიცდებათ, მათ ჯარიმის გადახდა მოუწევთ და ექსპერტთა აზრით, უფრო სერიოზული სასჯელის დაკისრების შანსი ძალიან პატარაა.

ცნობისთვის, პროკურატურამ ბრალდება „ბლაუგრანას“ ყოფილ პრეზიდენტებს, ხოსეპ ბარტომეუსა და სანდრო როსელისაც წაუყენა. მათ გარდა, ოსკარ გრაუს და ალბერტ სოლერსაც ადანაშაულებენ. ზემოთ ხსენებულ პირებს ბრალი კორუფციაში, არაკეთილსინდისიერ ადმინისტრირებასა და დოკუმენტების გაყალბებაში ედებათ. ბრალის დამტკიცების შემთხვევაში, მათ 6 თვიდან 4-წლამდე პატიმრობა ემუქრებათ.

რა ხდება ბარსას გარშემო

2016-დან 2018 წლამდე, „ბლაუგრანამ“ კომპანია DASNIL 95-ს 1.4 მილიონი ევრო გადაუხადა. აღნიშნული კომპანია ხოსე მარია ენრიკეს ნეგრეირას მფლობელობაშია, რომელიც იმ პერიოდში ესპანეთის ფეხბურთის სამეფო ფედერაციის სამსაჯო კომიტეტის ვიცე-პრეზიდენტი გახლდათ. AS-ის ინფორმაციით, DASNIL 95-სა და კატალონიელებს შორის თანამშრომლობა 2003 წელს დაიწყო და „ბარსამ“ საერთო ჯამში, 4.7 მილიონი ევრო გადაურიცხა. ესპანური გამოცემის მიხედვით, „ბლაუგრანას“ მიზანი მსაჯებისგან „რაიმე სახის სპორტული უპირატესობის“ მიღება იყო.