„ბოლო 60 წელში მეორე ფეხბურთელია, რომელმაც ეს შეძლო“ - იტალიური მედია კვარაზე

დღეს, იტალიის სერია A-ს ს მე-17 ტურში ხვიჩა კვარაცხელიას „ნაპოლი“ სტუმრად „სამპდორიას“ დაუპირისპირდება.

ქართველი ფეხბურთელის თამაშზე ბოლო დღეებში იტალიურ მედიაში სხვადასხვა ინფორმაცია ვრცელდებოდა. ნაწილი წერდა, რომ ლუჩანო სპალეტი შეხვედრაში სათადარიგოთა სკამიდან ჩაერთვებოდა, დღეს კი დაიწერა, რომ 21 წლის შემტევი მოედანზე პირველივე წუთებიდანვე გამოჩნდება. რომელია სწორი ინფორმაცია, ამას დაახლოებით 3 საათში გავიგებთ.

მანამდე კი, ცნობილმა სააგენტომ CalcioNapoli24-მა ნეაპოლიტანურ გუნდში ქართველი ფეხბურთელის რამდენიმე მიღწევა გამოარჩია.

რას წერს CALCIONAPOLI24:

ხვიჩა კვარაცხელიას სერია A-ს სადებიუტო სეზონში 6 გოლი აქვს გატანილი და ბოლო 60 წლის განმავლობაში მარეკ ჰამშიკის (9 გოლი 2007/08 წლების სეზონში) შემდეგ ის გახდა მეორე მოთამაშე, რომელმაც პირველივე სეზონში ხუთზე მეტი გოლი გაიტანა. ზოგადად, ისტორიაში კი მას მხოლოდ 4 მოთამაშე უსწრებს. მარეკ ჰამშიკი, ფერუჩიო სანტამარია (7 გოლი 1946/47 წლების სეზონში), კარლო ბუსკალია (10 გოლი 1929/30 წლების სეზონში) და ატილა სალუსტრო (13 გოლი 1929/30 წლების სეზონში). შესაბამისად, კვარაცხელიას ჯერ კიდევ აქვს შანსი, რომ კლუბის ისტორიაში საუკეთესო შედეგი აჩვენოს.

სერია A-ს მიმდინარე სეზონში, სამი მოთამაშიდან, ვინც ყველაზე მეტ გოლში მიიღო მონაწილეობა, ორი „ნაპოლის“ ფეხბურთელია: ვიქტორ ოსიმენი და ხვიჩა კვარაცხელია. ნიგერიელ ფორვარდს 9 გოლი და 2 საგოლე გადაცემა აქვს, ქართველის ანგარიშზე კი 5 გოლი და 6 საგოლე გადაცემაა. მათ გვერდით მესამე ფეხბურთელი რაფაელ ლეაოა.

შეგახსენებთ, რომ „ნაპოლიში“ დებიუტის დღიდან ხვიჩა კვარაცხელიამ ყველა ტურნირზე 18 შეხვედრა ჩაატარა, რომელშიც 8 გოლი გაიტანა და ამდენივე საგოლე გადაცემა შეასრულა.

ცნობისთვის, ლუჩანო სპალეტის გუნდი 16 ტურის შემდეგ იტალიის სერია A-ს სატურნირო ცხრილს 41 ქულით ლიდერობს და უახლოეს მდევარ „მილანს“ 4 ქულით უსწრებს.