იერუსალიმის მასტერსი | გრიგალაშვილი ოქროსთვის იბრძოლებს, შავდათუაშვილი უმედლოდ დარჩა

ისრაელის დედაქალაქ იერუსალიმში ძიუდოისტთა შორის 2022 წლის დასკვნითი მასტერსი მიმდინარეობს.

ტურნირის დასკვნით დღეს ტატამიზე საქართველოს სახელით 3 ძიუდოისტი წარსდგა, მათგან მედლის მოპოვების შანსი კი მხოლოდ ერთ ძიუდოისტს აქვს.

-73 კგ. წონით კატეგორიაში საქართველოს ნაკრებიდან ორმა ძიუდოისტმა იასპარეზა. გათამაშებაში პირველ წრიდან გიორგი ტერაშვილი ჩაერთო, თუმცა ქართველი ფალავანი მასპინძელ იდო ლევინთან დამატებით დროში იპონით დამარცხდა. ტერაშვილის შემდეგ, ტატამიზე საქართველოს ისტორიაში საუკეთესო ძიუდოისტი, ლაშა შავდათუაშვილი ვიხილეთ, თუმცა გამოცდილმა სპორტსმენმა მეორე წრეში ბრაზილიელი დანიელ კარგნინის ბარიერის დაძლევა ვერ შეძლო და ორი ვაზარის შემდეგ დამარცხდა.

-81 კგ. წონით კატეგორიაში მსოფლიოსა და ევროპის ჩემპიონი, ტატო გრიგალაშვილი გამოვიდა, რომელმაც ფინალში შეძლო გასვლა. ნახევარფინალში ტატომ ფრანგი ომარ დიალო ორი ვაზარით დაამარცხა, მანამდე კი იტალიელ ანტონიო ესპოზიტოს და უნგრელ ატილა ანგვარის მოუგო.

ოქროს მედლისთვის ბრძოლაში გრიგალაშვილის მეტოქე აზერბაიჯანელი საედ მოლაი იქნება, რომელმაც ნახევარფინალში ტატოს ერთ-ერთი მთავარი კონკურენტი, მატიას კასე დამატებით დროში იპონით დაამარცხა.

ფინალური ბლოკი საქართველოს დროით 19:00 საათიდან დაიწყება.