რიშარლისონის ბრწყინვალე გოლი და დუბლი - ბრაზილიამ სერბეთი დაამარცხა

მსოფლიო ჩემპიონატის ერთ-ერთმა ფავორიტმა, ბრაზილიის ნაკრებმა ტურნირი ბრწყინვალე სტილში დაიწყო. „სელესაო“ სერბეთის ეროვნულ გუნდს დაუპირისპირდა, შესანიშნავი შთაბეჭდილება დატოვა და მეტოქეს 2:0 სძლია, თუმცა მეტის გატანაც შეეძლო.

მატჩი ბრაზილიის ნაკრების უპირატესობით დაიწყო და პირველი მომენტიც მათ შექმნეს. ნეიმარმა კუთხური ჩაახვია და სერბეთი ხარიხამ იხსნა. 35-ე წუთზე, თავის გამოჩენის შანსი რაფინიას მიეცა, თუმცა დამაგვირგვინებელ ფაზაში ცუდად იმოქმედა და პირველი ტაიმი გატანილი გოლების გარეშე დასრულდა.

46-ე წუთზე, რაფინია ხელსაყრელ მდგომარეობაში კიდევ ერთხელ აღმოჩნდა, მაგრამ ამჯერადაც არაფერი გამოუვიდა. მესამოცე წუთზე სერბეთი ძელმა იხსნა, რამდენიმე წამის შემდეგ კი ბრაზილიამ ანგარიშის გახსნა მოახერხა. ვინისიუსის დარტყმა ვანია მილინკოვიჩ-სავიჩმა მოიგერია, თუმცა დამატებაზე პირველი რიშარლისონი იყო და საკუთარი გუნდი დააწინაურა. ამ უკანასკნელმა მალევე დუბლი მიითვალა, სერბეთის ნაკრების კარი ფენომენალური გოლით დალაშქრა და საბოლოო ანგარიში დააფიქსირა - 2:0.

ამრიგად, ბრაზილია პირველ ადგილზე იმყოფება და შვეიცარიას ბურთების უკეთესი შეფარდების ხარჯზე უსწრებს. „სელესაო“ მომდევნო მატჩს სწორედ შვეიცარიის წინააღმდეგ გამართავს და ეს 28 ნოემბერს მოხდება.