„ლენტინისა და ჯიჯი მერონის სინთეზია“ - ალდო სერენა კვარაცხელიაზე

სერია ა-ს მე-11 ტურში ჟოზე მოურინიოს „რომა“ „სტადიო ოლიმპიკოზე“ ჩემპიონატის ლიდერს, ლუჩანო სპალეტის გაწვრთნილ „ნაპოლის“ უმასპინძლებს. ამ მატჩის მიმართ დიდი ინტერესია და შეხვედრამდე არაერთმა ცნობილმა პიროვნებამ ისაუბრა. მათ შორისაა „ინტერის“, „მილანისა და „იუვენტუსის“ ყოფილი ფეხბურთელი ალდო სერენა, რომელიც 80-იან წლებში იტალიის ეროვნულ ნაკრებში თამაშობდა.

ალდო სერენა TMW Radio-ს ესაუბრა:

„ამ სეზონში „ნაპოლი“ მაოცებს, რასაც „რომას“ მიმართ ვერ ვიტყვი, ეს ორი გუნდი განსხვავებულ ფეხბურთს თამაშობს, მათი საფეხბურთო ფილოსოფია განსხვავებულია. „ნაპოლი“ აგრესიულ ფეხბურთს თამაშობს და ასე იმარჯვებს. ნეაპოლური კლუბის მოთამაშეები მხეცები არიან, რომლებიც მეტოქეს ანადგურებენ“.

კითხვაზე, რომელ ფეხბურთელს ახსენებს კვარაცხელია, ალდო სერენა შემდეგს პასუხობს: „მას აქვს მსგავსება ჯანლუიჯი ლენტინისთან, მაგრამ ცოტათი ჯიჯი მერონის მაგონებს. კვარაცხელია ლენტინისა და მერონის სინთეზია“.

ჯანლუიჯი ლენტინი ლეგენდარული იტალიელი ფეხბურთელია, 1992-96 წლებში „მილანში“ თამაშობდა, 1993-94 წლების სეზონში ჩემპიონთა ლიგა მოიგო. რაც შეეხება ჯიჯი მერონის, ლეგენდარული გარემარბი „კომოში“ (1960-62), „ჯენოასა“ (1962-64) და „ტორინოში“ (1964-67) თამაშობდა.

ალდო სერენამ კვარაცხელიაზე მეორედ ისაუბრა. პირველად, 10 ოქტომბერს რადიო CRC-სთან გამოთქვა აზრი ხვიჩას შესახებ.

ალდო სერენა: „კვარაცხელიას არ ვიცნობდი. მას მიმდინარე სეზონში ვადევნებ თვალს. ის არის მოთამაშე სხვა ეპოქიდან, 70-იანი წლებიდან. ჩვეულებრივ, მწვრთნელები ასეთი თვისებების მქონე ფეხბურთელებს ჩარჩოში აქცევენ, მაგრამ ვფიქრობ, სპალეტის სურს, რომ დისციპლინა ასწავლოს, დისციპლინირებული გახადოს. კვარაცხელიას სახით „ნაპოლის“ ჰყავს მოთამაშე, რომელსაც მატჩის ბედის შეცვლა შეუძლია“.

შეგახსენებთ, ხვიჩა კვარაცხელიამ სერია ა-ს მიმდინარე სეზონში ყველა ტურში ითამაშა, 10 მატჩი ჩაატარა, 5 გოლი შეაგდო, 3 საგოლე პასი შეასრულა და 2 პენალტი გამოიმუშავა. ასევე, ჩემპიონთა ლიგის ჯგუფურ ეტაპზე 4 მატჩში 2 გოლითა და 2 საგოლე გადაცემით დაეხმარა გუნდს. გარდა ამისა, „რეინჯერსთან“ პენალტი მოიპოვა.

სერია ა-ს მე-11 ტურში „რომასა“ და „ნაპოლის“ დაპირისპირება 23 ოქტომბერს გაიმართება, თბილისის დროით 22 საათსა და 45 წუთზე დაიწყება.