„ეს ჩემი გუნდია, ეს ჩემი ფერებია“ - კვეკვესკირმა ლეხთან კონტრაქტი გაახანგრძლივა
„ლეხის“ ქართველმა ფეხბურთელმა, ნიკა კვეკვესკირმა კლუბთან კონტრაქტი გაახანგრძლივა. 30 წლის ნახევარმცველმა „ლეხს“ საკუთარი მომავალი კიდევ 2 წლით დაუკავშირა (მისი კონტრაქტი მიმდინარე სეზონის ბოლოს იწურებოდა) და პოზნანელთა ღირსებას 2025 წლის 30 ივნისამდე დაიცავს.
Nika Kvekveskiri już po raz trzeci złożył podpis pod umową z Kolejorzem ✍️???? #Kvekve2025 ????????
— Mistrz Polski ???? (@LechPoznan) October 20, 2022
➡️ https://t.co/zJYgqDGuT7 pic.twitter.com/KW3QWL63kp
„ჩემი აქაური თავგადასავალი რთულად დაიწყო, მაგრამ დროთა განმავლობაში, გუნდში ადგილი დავიმკვიდრე და ჩემი ღირებულება დავამტკიცე. ფანტასტიკური გუნდის ნაწილი გავხდი, რომელთან ერთადაც, ადგილობრივი ჩემპიონატი მოვიგე. ეს ტიტული ჩემთვის განსაკუთრებული იყო, რადგან კლუბისა და ქომაგებისთვის მნიშვნელოვან წელს დავისაკუთრეთ. ამ წარმატების გამო, თითოეული ჩვენგანი უდიდეს სიამაყეს გრძნობს.
ბედნიერი ვარ, ლეხთან კონტრაქტი რომ გავახანგრძლივე, რადგან პოზნანში თავს ისე ვგრძნობ, როგორც საკუთარ სახლში. იგივე შემიძლია ვთქვა ჩემი ოჯახის წევრებზე, რომლებიც ამ ქალაქს განსაკუთრებულად ეპყრობიან. ლეხი ჩემი გუნდია, ეს ჩემი ფერებია და მინდა, მაქსიმუმი გავაკეთო, რათა კლუბის მიერ გამოჩენილი ნდობა გავამართლო. ერთი ჩემპიონობით კმაყოფილი არ ვარ. მინდა, პოლონეთში უფრო მეტი ტიტული მოვიგო და ევროსარბიელზე ლეხი ღირსეულად წარმოვაჩინო“, - განაცხადა „კვეკვემ“.
შეგახსენებთ, რომ ქართველი ფეხბურთელის გუნდს 21 ქულა აქვს და სატურნირო ცხრილის მე-7 ადგილს იკავებს. „ლეხს“ მომდევნო შეხვედრა 23 ოქტომბერს ელის და ოთარ კაკაბაძის „კრაკოვიას“ დაუპირისპირდება.
