გაგრა და დილა კრისტალბეთ ეროვნული ლიგის მატჩებს გორში ჩაატარებენ
საქართველოს კრისტალბეთ ეროვნული ლიგის 2022 წლის გათამაშება სტარტს 25 თებერვალს, ბათუმში, 19:00 საათიდან აიღებს, სადაც რანგით უმაღლესი ლიგის გამარჯვებული დინამო ბათუმი კრისტალბეთ ლიგა 2-ის გამარჯვებულს, ბოლნისის სიონს უმასპინძლებს.
საქართველოს კრისტალბეთ ეროვნული ლიგის სეზონის კალენდარული უკვე ცნობილია, ქართული ფეხბურთის გულშემატკივრისთვის ასევე კარგადაა ცნობილი ის 10 გუნდიც, რომელიც რანგით უმაღლეს ლიგაში ითამაშებს:
დილა, დინამო ბათუმი, დინამო თბილისი, გაგრა, ლოკომოტივი, საბურთალო, სამგურალი, სიონი, თელავი, ტორპედო.
გაგრამ საქართველოს კრისტალბეთ ეროვნულ ლიგაში თამაშის უფლება 10-წლიანი პაუზის შემდეგ მოიპოვა.
გუნდი გასულ სეზონში ლიგა 2-ის შეხვედრებს თბილისის ზღვის ბაზაზე მართავდა, თუმცა CrystalSport-ის ინფორმაციით, გაგა კირკიტაძის გუნდი რანგით უმაღლესი ლიგის შეხვედრებს გორში, თენგიზ ბურჯანაძის სახელობის სტადიონზე ჩაატარებს, სადაც ადგილობრივი გორის დილა თამაშობს.
ფოტო: საქართველოს ფეხბურთის ფედერაცია
CrystalSport-ის ინფორმაციით, მოლაპარაკებები აქტიურ ფაზაშია და უდიდესი ალბათობით, შეთანხმება შედგება. იმ შემთხვევაში, თუ გუნდები ერთმანეთის პირისპირ აღმოჩნდებიან მასპინძელი კლუბი განისაზღვრება, დაპირისპირების ლოკაცია კი არ შეიცვლება.
აღსანიშნავია, რომ დილა-გაგრას მატჩი პირველივე ტურში, 26 თებერვალსაა ჩანიშნული, ხოლო საქართველოს კრისტალბეთ ეროვნულ ლიგაში გაგრას პირველი საშინაო შეხვედრის ჩატარება 5 მარტს, საბურთალოს წინააღმდეგ მოუწევს.
