წილისყრა უეფაში - ევროპის ჩემპიონატების განახლებული ფორმატი
უეფას აღმასრულებელი კომიტეტის გადაწყვეტილებით, 2021-22 წლების სეზონიდან გოგონათა 17-წლამდე და 19-წლამდე ევროპის ჩემპიონატი განახლებული ფორმატით გაიმართება.
11 მარტს, 2021-22 წლების სეზონის გოგონათა 17-წლამდე და 19-წლამდე ევროპის ჩემპიონატის განახლებული ფორმატის პირველი რაუნდის წილისყრა შედგა.
საქართველოს 17-წლამდე და 19-წლამდე გოგონათა ნაკრებები B ლიგაში იასპარეზებენ. 17-წლამდელები პირველ რაუნდის B1 ჯგუფში - ბელარუსის, კოსოვოსა და ლუქსემბურგის ნაკრებებს დაუპირისპირდებიან. 19-წლამდელები კი, B4 ჯგუფში მოხვდნენ და მათი მეტოქეები ისრაელი, რუმინეთი და მალტა იქნებიან.
ფორმატის ცვლილების მიუხედავად, ძალაში რჩება მინი-ტურნირების პრინციპი. საქართველოს 17-წლამდე ნაკრები პირველი რაუნდის მატჩებს მიმდინარე წლის 1 აგვისტოდან 14 ნოემბრამდე პერიოდში გამართავს. 19-წლამდელთა მინი-ტურნირები კი, 14-21 სექტემბერს და 19-26 ოქტომბერს გაიმართება. პირველი რაუნდის ჯგუფების მასპინძელი ქვეყნები და მატჩების სრული კალენდარი უახლოეს მომავალში გახდება ცნობილი.
ახალი ფორმატის მიხედვით, საკვალიფიკაციო ეტაპს და ელიტ-რაუნდს, უეფას ერთა ლიგის მსგავსი გათამაშება ჩაანაცვლებს. ფინალურ ეტაპამდე გუნდები ორ რაუნდიან შესარჩევ ეტაპს გაივლიან. პირველ რაუნდში ტურნირის მონაწილე 52 ნაკრები რეიტინგის მიხედვით A და B ლიგაში გადანაწილდება. A ლიგაში შვიდი ოთხგუნდიანი ჯგუფი შეიქმნება, B ლიგაში კი, ექვსი. მეორე რაუნდში A ლიგაში ასპარეზობის უფლებას B ლიგის ექვს პირველ ადგილოსანთან ერთად, ერთი საუკეთესო მეორე ადგილოსანი მოიპოვებს. შესარჩევი ეტაპის მეორე რაუნდში დარჩენილი 28 გუნდი წილისყრის შედეგად 7 ჯგუფში გადანაწილდება და ჯგუფების გამარჯვებულები ფინალურ ეტაპზე ასპარეზობის უფლებას მოიპოვებენ. სადაც მათ ევროპის ჩემპიონატის მასპინძელი ქვეყნის ნაკრები დაემატება. საბოლოოდ, კონტინენტის უძლიერესი გუნდის სტატუსისთვის 8 ასაკობრივი ნაკრები იბრძოლებს. A ლიგის შვიდ ჯგუფში ბოლო,მეოთხე ადგილზე გასული ნაკრებები ახალი სეზონისთვის B ლიგაში დაქვეითდებიან.
17-წლამდე გოგონათა ევროპის ჩემპიონატს 2022 წელს ბოსნია-ჰერცეგოვინა უმასპინძლებს. ფინალური ეტაპის მატჩები 3-15 მაისს გაიმართება. რაც შეეხება 19-წლამდე გოგონათა ევროპის ჩემპიონატს, ტურნირი ასევე 2022 წელს, 27 ივნისიდან 9 ივლისის ჩათვლით ჩეხეთში ჩატარდება.
