Daily Mail - პოჩეტინოს წასვლა გადაწყვეტილია

პრესტიჟული ბრიტანული გამოცემა, Daily Mail იტყობინება, რომ მაურისიო პოჩეტინოს „ტოტენჰემიდან“ წასვლა პრაქტიკულად გადაწყვეტილია და კლუბი უკვე მის შემცვლელს ეძებს.

არგენტინელი სპეციალისტის გუნდს სერიოზული პრობლემები აქვს. ლონდონელები პრემიერ ლიგის მე-14 ადგილს იკავებენ და ინგლისის უმაღლეს დივიზიონში გამარჯვება სექტემბრის შემდეგ არ უზეიმიათ. „დეზების“ ხელმძღვანელობა გუნდის მიერ ნაჩვენები შედეგით უკმაყოფილოა და პოჩეტინოსთან დაკავშირებით კითხვის ნიშნებიც გაუჩნდა.

„ტოტენჰემში“ მომუშავე ანონიმურ წყაროზე დაყრდნობით Daily Mail იტყობინება, რომ გამორიცხულია მიმდინარე სეზონი პოჩეტინომ ლონდონელთა მთავარი მწვრთნელის რანგში დაასრულოს. როგორც ირკვევა „დეზების“ მმართველები უკვე ახალ გეგმაზე მუშაობენ და რამდენიმე კანდიდატიც შერჩეული ჰყავთ.

ბრიტანული გამოცემის მიხედვით „ტოტენჰემის“ მესვეურები პოჩეტინოს შემცვლელად კარლო ანჩელოტის, ედი ჰოუის და იულიან ნაგელსმანს განიხილავენ. აქვე გეტყვით, რომ „დეზების“ თავკაცის პოსტის დატოვების შემთხვევაში პოჩეტინო უმუშევარი დიდხანს ნამდვილად არ დარჩება. ამავე Daily Mail-ის ცნობით პოჩეტინოს გადაბირებით ევროპული ფეხბურთის რამდენიმე გრანდი ინტერესდება.