ყველაფერი, რაც ჩემპიონთა ლიგაზე გამოგრჩათ
მისი უდიდებულესობა - ჩემპიონთა ლიგა დაბრუნდა!
„ოლდ ტრაფორდზე“ „მანჩესტერ იუნაიტედმა“ „პსჟ“ მიიღო და 0-2 დამარცხდა. „წითელი ეშმაკებს“ შემდეგ ეტაპზე გასვლის საკმაოდ მცირე შანსი დარჩათ. პოლ პოგბამ წითელი ბარათი მიიღო და სოლსკიაერის ბიჭებს პარიზში ჩასვლა გუნდის ერთ-ერთი ლიდერის გარეშე მოუწევთ.
მეორე შეხვედრაში „რომა“ „პორტუს შეერკინა და ძანიოლოს დუბლის წყალობით 2-1 იმარჯვა.
„მანჩესტერის“ ანტირეკორდი
„იუნაიტედი“ ევროპული ტურნირების ეგიდით საკუთარ კედლებში ორბურთიანი სხვაობით პირველად დამარცხდა.
აღსანიშნავია, რომ 2010-11 წლების შემდეგ დევიდ მოიესი ერთადერთია, ვისი წინამძღოლობით „მანჩესტერმა“ ჩემპიონთა ლიგის პლეიოფის შეხვედრა მოიგო.
„რომას“ ფანატების ბანერი
ედინ ჯეკოს შედეგიანი გადაცემების წყალობით „რომამ“ „სტადიო ოლიმპიკოზე“ „პორტუ“ დაამარცხა.
„ჯალოროსოს“ გულშემატკივრებმა ტრიბუნებზე უცნაური ბანერი გამოფინეს, რომელზეც ასეთი წარწერა გახლდათ გამოსახული: „ნაბიჭვარი კოლაროვი“.
რომაელი ულტრასების გაღიზიანება სერბი ფეხბურთელის სიტყვებმა განაპირობეს. „ჯალოროსოს“ ფანატები რამდენიმე კვირის წინ გუნდს ხშირად აკრიტიკებდნენ და როცა ამ საკითხის შესახებ კითხვა კოლაროვს დაუსვეს, სერბმა განაცხადა: „მათ ფეხბურთის შესახებ არაფერი იციან“.
„მანჩესტერის“ ქომაგებმა დი მარიას უსტვინეს
ანხელ დი მარიას „იუნაიტედის“ გულშემატკივრებმა თამაშის მიმდინარეობისას რამდენჯერმე უსტვინეს, მაგრამ ყველაფერი გაცილებით ადრე დაიწყო.
„მანჩესტერის“ ქომაგები „პსჟ“-ს ავტობუსს დახვდნენ და დი მარიას „საკადრისად“ შეეგებნენ.
Manchester United fans boo Angel Di Maria as he gets off the PSG bus upon arrival at Old Trafford. pic.twitter.com/LiNV3PAK1h
— Get French Football News (@GFFN) February 12, 2019
დი მარია და ბოთლი
„მანჩესტერისა“ და „პსჟ“-ს მატჩის მიმდინარეობისას დი მარიას მისამართით ბოთლი ისროლეს. არგენტინელმა ფეხბურთელმა ალკოჰოლის მიღების იმიტაცია გააკეთა და შემდეგ ბოთლი მოისროლა.
2005 წლის თებერვლის შემდეგ პირველად...
თამამად შეგვიძლია ვთქვათ, რომ „იუნაიტედმა“ ჩემპიონთა ლიგაზე ერთ-ერთი ყველაზე ცუდი შეხვედრა ჩაატარა. ამაზე სტატისტიკური მონაცემებიც მეტყველებენ.
„წითელმა ეშმაკებმა“ „პსჟ“-ის კარის ჩარჩოში ბურთი ერთადერთხელ მოახვედრეს. „ოლდ ტრაფორდზე“ ჩემპიონთა ლიგის ეგიდით ბოლო ასეთი რამ 2005 წლის თებერვალში დაფიქსირდა.
